Sońǵy 32 jyl boiy Syrdariia basseindik sharýashylyq birlestigin Ózbekstan ókili basqaryp kelgen, dep habarlaidy QazAqparat.
Redaktsiia saýalyna bergen jaýapta Ekologiia, geologiia jáne tabiǵi resrýstar ministrligi bul málimette rastady.
«2018 jyly Túrkmenbashy qalasynda ótken Halyqarylyq Araldy qutqarý qorynyń Sammitinde Prezidentter kótergen bastamalardy oryndaý maqsatynda HAQQ atqarýshy komiteti HAQQ institýtsionaldyq-quqyqtyq bazasyn jetildirý jónindegi óńirlik jumys tobyn qurdy. Jumys tobynyń sheńberinde qazaqstandyq tarap «Syrdariia» jáne «Ámýdariia» basseindik sý sharýashylyǵy birlestikteriniń personalyn internatsionaldandyrý jáne basshylaryn rotatsiialaý máselesine bastamashylyq jasady. Jumys tobynyń kezekti otyrystarynda bul máseleni Qazaqstan tarapy kóteretin bolady», - deidi vitse-ministr Serik Qojaniiazov.
Qazaqstan taraby bul máseleni Halyqarylyq Araldy qutqarý qorynyń aiasynda da, atalmysh nysandar ornalasqan Ózbekstan biligimen kelissózder aiasynda da talqylap, naqty usynystar kóterip júr.
«Shynymen de Syrdariia basseiindik sharýashylyq birlestigin Ózbekstan ókili 32 jyl basqaryp kele jatyr. Bul másele jóninde osy ýaqytqa deiin Memleketaralyq úilestirýshi sýsharýashylyǵy komissiia otyrystary aiasynda jáne ózbek tarapymen eki jaqty kezdesýler barysynda birneshe ret kóterildi. Qazirgi ýaqytta eki eldiń ministrleri arasynda Qazaqstan Respýblikasynyń ókilderin «Syrdariia» BSB basshysynyń orynbasary, sý bólý jáne sý teńgerimderi basqarmasynyń sý paidalaný bóliminiń bastyǵy, Gúlistan sý toraptary jáne «Dostyq» kanaly basqarmasy bastyǵynyń orynbasary laýazymdaryna taǵaiyndaý boiynsha ýaǵdalastyqtarǵa qol jetkizdi», - delingen jaýapta.
