Qazaqstannyń qoi etine shet elderdiń qyzyǵýshylyǵy joǵary. Bul týraly Jazylbek Qýanyshbaevtyń 125 jyldyǵyna arnalǵan «Qazaqstannyń qoi sharýashylyǵy: ótkeni, búgini jáne keleshegi» taqyrybyndaǵy konferentsiiada QR Aýyl sharýashylyǵy ministri Saparhan Omarov aitty, dep habarlaidy QazAqparat.
«Qazirgi tańda Qazaqstannyń ishki naryǵy otandyq qoi etimen 100 paiyzǵa qamtamasyz etilgenin atap ótkim keledi. Sonymen birge, otandyq qoi etine shet elderdiń qyzyǵýshylyǵy zor ekeni belgili. Mysaly, boljam boiynsha 2026 jyly Qytai Halyq Respýblikasy 232 myń tonna, Eýraziia odaǵy elderi 172 myń tonna, Birikken Arab Ámirligi 228 myń tonna, Malaiziia 46 myń tonna qoi etin qajet etedi. Al bul bizdiń respýblikamyzdyń keń baitaq jaiylymda qoi ósirýdi damytýǵa zor múmkindik beretini anyq. Bolashaqta respýblikanyń qoi sharýashylyǵy jahandyq naryqta tek joǵary sapaly ónimmen, jańa tehnologiialardy paidalanýmen básekelese alady», - dedi ministr.
Sonymen qatar ol biyl Qazaqstan Respýblikasynyń agroónerkásiptik keshenin damytýdyń memlekettik baǵdarlamasy aiaqtalatyndyǵyn atap ótti.
«Memleket basshysy Úkimetke biznespen birlesip, agroónerkásiptik keshenin damytýdyń aldaǵy 5 jylǵa arnalǵan sapaly jańa Ulttyq jobasyn ázirleýdi tapsyrdy. Osy jyldyń 21 sáýirinde ótken Reformalar jónindegi joǵarǵy keńestiń kezekti otyrysynda Memleket basshysy Ulttyq joba boiynsha jalpy tásildemelerdi maquldandy. Agroónerkásiptik keshenin damytýǵa baǵyttalǵan Ulttyq jobada qoi sharýashylyǵymen ainalysatyn fermerlerdi úzdik dúniejúzilik tájiribeler men tehnologiialardy qoldanýǵa yntalandyrý, jaiylymdardy igerýde jańa tehnika men tehnologiialardy alýǵa jeńildetilgen kreditter berý, fermerlerdi jaiylymmen qamtamasyz etý, halyqaralyq qarjy institýttarynan qarajat tartý, shopandardyń zeinetke shyǵý jasyn tómendetý, balalaryna memlekettik-jekeshelik áriptestiktik negizinde mektep-internattar qurý siiaqty is-sharalar qarastyrylǵan. Alda birlesip atqaratyn jumystar kóp», - dedi Saparhan Omarov.
