The Washington Post basylymy Qazaqstanda ázirlengen COVID-19-ǵa qarsy vaktsinany keleshegi zor eksperimenttik 200 vaktsina tizimine qosty, dep habarlaidy "Ult aqparat".
The Washington Post-ta jariialanǵan saraptamaǵa sáikes, Qazaqstan Respýblikasy «Biologiialyq qaýipsizdik problemalary ǵylymi-zertteý institýty» RMK ázirlegen koronavirýs infektsiiasyna qarsy vaktsina keleshekte búkil álemdi jailaǵan indetti jeńýge kómek bere alatyn eksperimenttik 200 vaktsina tizimine qosylǵan.
The Washington Post qazaqstandyq vaktsinany ázirleýge uzaq ýaqyt ketetin álsiz jáne inaktivtelgen virýstyq vaktsinalar sanatyna qosyp otyr. Biraq bul vaktsinanyń tiimdiligine áser etedi degen sóz emes.
«Iá, vaktsinanyń bul túrin ázirleý barysynda barynsha eskirgen ádis qoldanylady. Ol kezde virýs álsireidi. Sondyqtan ol aýrý týdyrmaidy. Biraq, aǵzanyń immýndyq júiesinde qorǵanys tetigin iske qosady. Qyzylshaǵa, epidemiologiialyq parotitte jáne qyzamyqqa qarsy vaktsinada dál osy ádis qoldanylady. Inaktivtelgen virýstyq vaktsinada adamdarǵa juǵýǵa qabiletsiz, alaida immýndyq júiege infektsiiaǵa qarsy qorǵanys reaktsiiasyn qalai uiymdastyrýdy kórsete alatyn óli virýstar bolady. Bul ádisti amerikalyq virýsolog Djonas Solk poliomielitke qarsy vaktsina ázirleý barysynda qoldanǵan. Atap óterligi, Solk vaktsinasyn qoldanǵannan keiin AQSh-ta balalar arasyndaǵy poliomelitke shaldyǵý 96 paiyzǵa tómendedi. Sonymen qatar bul ádis tumaýǵa qarsy vaktsinany ázirleý barysynda da qoldanylady», - dep jazady The Washington Post.
Basylymnyń atap ótýinshe, qazirdiń ózinde koronavirýsqa qarsy 170-ten astam vaktsina zerthanalarda janýarlarǵa, 7 vaktsina deni saý jas adamdarǵa, 12 vaktsina táýekel tobyna kiretin adamdarǵa salynyp, synqtan ótip jatyr.
Munan bólek, taǵy 7 vaktsina tiimdiligi men qaýipsizdigin anyqtaý úshin 1 myń adamǵa salynǵan. Ókinishke qarai, ázirshe bir de bir vaktsina tolyqqandy qoldaný úshin maquldanǵan joq.
Esterińizge sala ketsek, 2020 jyldyń 26 shildesinde qazaqstandyq vaktsinanyń 5 ázirleýshisi tiri virýspen jumys isteý barysynda qaýipsizdigin qamtamasyz etý úshin erikti túrde vaktsinany ózderine synady.
QR Densaýlyq saqtaý ministrliginen ruqsat alynǵannan keiin 2020 jyldyń 20 qyrkúieginde Almaty qalasyndaǵy klinikanyń bazasynda COVID-19-ǵa antidenesi joq 44 eriktige klinikalyq synaq (I faza) bastalýy tiis.
2020 jyldyń qazan aiynyń ortasynda Dúniejúzilik densaýlyq saqtaý uiymynyń talaptaryna sai keletin 200 eriktige klinikalyq synaq ótkizýdiń II fazasyna shyǵý josparlanǵan. Klinikalyq synaqtyń II fazasy 2020 jyldyń jeltoqsan aiynda aiaqtalmaq.
Aita ketken jón, Biologiialyq qaýipsizdik problemalary ǵylymi-zertteý institýty ázirlegen Covid-19 qarsy ekinshi vaktsina Dúniejúzilik densaýlyq saqtaý uiymynyń saityna tirkelgen bolatyn.
COVID-19 vaktsinasyn jasaý boiynsha jumystardyń barysyna qyzyǵýshylyq tanytqan azamattar DDSU veb-saitynda vaktsinaǵa úmitkerler týraly jalpy sholýdy oqi alady.
Aldyn ala boljamǵa sáikes, Qazaqstanda koronavirýsqa qarsy vaktsina 65 jastan asqan, júrek-qan tamyry aýrýy, qant diabeti jáne sozylmaly ókpe aýrýlary bar táýekel tobyna kiretin adamdarǵa jáne meditsina qyzmetkerlerine salynady.
Vaktsina alatyndardyń boljamdy sany - 2 347 000 adam.
