Jyl saiyn 4 maýsymda Qazaqstanda Memlekettik rámizder kúni toilanady. Qazaqstan týy - Táýelsizdikdiń asa mańyzdy belgileriniń biri. Ataýly kúnge orai QazAqparat tilshisi memlekettik týdy ázirleý jumystarymen tanysty.
Táýelsiz Qazaqstannyń Memlekettik týy 1992 jyly resmi túrde qabyldandy. Onyń avtory – tanymal sýretshi Sháken Niiazbekov.
Memlekettik rámiz talabyna sáikes, Qazaqstan Respýblikasynyń Memlekettik týy – ortasynda shuǵylaly kún, onyń astynda qalyqtap ushqan qyran beinelengen kógildir tústi tik buryshty mata. Týdyń saby tusynda tik jolaq túrinde ulttyq órnek naqyshtalǵan. Kún men onyń sáýleleri, qyran jáne ulttyq órnek altyn tústes. Týdyń eni men uzyndyǵynyń araqatynasy – 1:2 bolýy tiis.
Elordalyq «ZOOM» kompaniiasy 9 jyldan beri memlekettik simvoldardy ázirleýmen ainalysyp keledi. Kompaniia QR memlekettik rámizderin ázirleý boiynsha resmi litsenziia alǵan.
«Biz Aqorda, Parlament jáne ózge de memlekettik organdar men elshilikter úshin tý ázirleimiz. Ol úshin atlas, gabardin, tafta materialdary qoldanylady. Mundai matalar ǵimarat ishinde turatyn týlardy ázirleýge jumsalady. Al dalada, ǵimarat syrtyna ilinetin týlar jalaýǵa arnalǵan tordan (Flajnaia setka) tigiledi. Jalaý torlary - barlyq aýa raiy jaǵdaiyna tózimdi bolyp keledi. Al atlas pen gabardin tyǵyz bolǵandyqtan, aýa ótkizbeidi», - dep túsindirdi «ZOOM» jarnama agenttiginiń direktory Saltanat Ahmetova «QazAqparat» tilshisine bergen suhbatynda.
Qazaqstan týyndaǵy beineler mindetti túrde eki jaqtan basylýy kerek. Eń aldymen tý sýblimatsiialyq qaǵazda shyǵarylady. Beineler qanyq shyǵý úshin 300 gradýstyq rejimde biriktirý jumystary júrgiziledi. Bul protsesterden keiin aq qaǵaz parametrler boiynsha qajetti tústerge ainalady. Odan bólek, tsehta tý kesteleitin arnaiy mashina jumys isteidi.
«Sonymen birge, jan-jaǵynda shashaǵy bar bairaq jasaýmen de ainalysamyz. Ony túrli saltanatty sharalarda, fotosessiialarda paidalanady, kabinet ishine qoiady jáne týtuǵyrǵa iledi. Bairaq dalada ilinbeitin bolǵandyqtan, ony gabardinnen ázirleimiz. Onyń da eki jaǵy birdei kestelenýi kerek», - deidi kompaniia ókili.
Aita keteiik, Qazaqstandaǵy eń úlken týdyń kólemi - 15:30, ol Nur-Sultan qalasynda «Atameken» etno-memorialdy kesheniniń aýmaǵyna ornalasqan jáne bul týdy da «ZOOM» kompaniiasy ázirlegen.
«Elimizdegi eń úlken tý jalaýǵa arnalǵan tor matadan tigilgen. Ony basyp, tigýge, jinaqtaýǵa bir ai ýaqyt jumsaldy. Daiyn bolǵan soń qasymyzdaǵy №53 mekteptiń oqýshylary týdy jaiyp kórdi. Olar Qazaqstannyń eń úlken týyn ustap, boilaryn erekshe maqtanysh sezimi kernegenin aitty. Osylaisha, biz memleketimizdiń kúsh-qýatyn kórsetkimiz keledi», - dedi Saltanat Ahmetova.
Al standartty 1:2 kólemindegi týdy ázirleýge shamamen bir kún qajet. 1:2 kólemindegi kabinettik týlar shamamen 25 myń teńgege, tordan jasalǵan týlar - 15 myń teńgege baǵalanady.
«Biz naryqta 16 jyl jumys istep kelemiz jáne sońǵy 9 jylda Qazaqstan týynyń negizgi jetkizýshisi atandyq. Barlyq óńirlermen jáne eldermen jumys isteimiz. Ótken jyly Germaniiaǵa, Braziliiaǵa jáne Qatardaǵy elshilikterge kók týymyzdy jiberdik», - dedi ol.
Sonymen birge, kompaniia QR Syrtqy ister ministrligimen jáne Nur-Sultandaǵy elshiliktermen tyǵyz jumys isteidi.
«Qazaqstanǵa kelgen árbir sheteldik qonaq óz týynyń barlyq standartqa sáikes jasalǵanyn kórýi kerek. Bizdiń basty maqsatymyz - osy. Ár eldiń týyna belgili bir standarttar qoiylady. Qazir, máselen Portýgaliianyń týyn ázirlep jatyrmyz. Munda da Portýgaliia týynyń barlyq erekshelikterin, qoiylatyn talaptaryn zerttedik. Ońtústik Koreia, AQSh, Japoniia týlaryn ázirleý óte qiyn, onda eskeretin dúnie kóp. Mysaly, Japoniia týynyń túsi el aýmaǵynda bir túste, shekara syrtynda - basqa túste bolady. Ótken jyly 80 memleket ókilderi qatysqan úlken forým ótti. Biz barlyq eldiń týlaryn ázirleýge kómektestik. Sonda bir memleket ókili óz týynyń sapasyn unatyp, ózimen birge alyp ketti. Biz óz jumystarymyzben maqtanamyz jáne memlekettik rámizderdiń barlyq talapqa sai ázirleýge tyrysamyz», - dedi S. Ahmetova.
Sonymen birge, S. Ahmetova týǵa durys kútim jasaý tásilderin aityp berdi.
«Syrtqa arnalǵan, tordan tigilgen týlar qatty jel, daýyl syndy tabiǵi qubylystar bolmasa, uzaqqa shydaýy tiis. Kúnnen de boiaýyn ózgerte qoimaidy. Ony kórsetilgen temperatýrada kir jýatyn mashinada jýýǵa bolady. Gabardin, tafta týlary da dál solai, jýyp-keptirip, útikteýge bolady. Ár buiymda bizdiń litsenziiamyz kórsetiledi, onda týdy jýý, útikteý nusqaýlyǵy, kólemi, shyǵarylǵan merzimi jazylǵan», - dedi Saltanat Ahmetova.
.jpeg)