2018 jyly 15 qańtarda Qazaqstan Respýblikasynyń Ulttyq mýzeiinde Qoǵamdyq sanany jańǵyrtý baǵdarlamasy aiasynda Mádeniet jáne sport ministrliginiń uiymdastyrýymen «Qazaqstannyń kieli jerleriniń geografiiasy» jobasyna arnalǵan II respýblikalyq forým ótti.
Forýmda «Qazaqstannyń kieli jerleriniń geografiiasy» jobasy boiynsha 2017 jyly atqarylǵan jumystardyń nátijeleri men aldaǵy jyldarǵa arnalǵan josparlary talqylandy.
Forýmǵa memlekettik organdardyń ókilderi, óńirlerdiń mádeniet, týrizm basqarmalarynyń basshylary, respýblikalyq, oblystyq mýzeiler men mýzei-qoryqtardyń direktorlary, belgili ǵalymdar jáne t.b. qatysty.
II Respýblikalyq forýmnyń alǵy sózinde QR Mádeniet jáne sport ministrliginiń Jaýapty hatshysy Q. Ýáliev: «2017 jyly Qazaqstannyń kieli jerlerin anyqtaýǵa bailanysty ótken I Respýblikalyq forýmda jobanyń maqsat-mindetterin, josparlaryn aiqyndap alǵan bolatynbyz. Josparǵa sáikes QR Mádeniet jáne sport ministrliginiń uiymdastyrýmen birshama aýqymdy jumystar atqaryldy. Qazaqstannyń kieli jerler geografiiasy jobasyn tiimdi júzege asyrý maqsatynda arnaiy jumys toby jáne jobalaý keńsesi, QR Ulttyq mýzeii janynan «Qasietti Qazaqstan» ólketanýdy damytý ortalyǵy quryldy. «Qasietti Qazaqstan» ortalyǵy janynan ǵylymi saraptamalyq keńes quryldy. Onyń jumysyna ǵalymdar, tarihshylar, arheologtar, qoǵam qairatkerleri, ólketanýshylar tartyldy. Osynyń nátijesinde júieli jumystar atqarylyp, nátijesinde «Qazaqstannyń jalpyulttyq qasietti nysandary», «Qazaqstannyń óńirlik qasietti nysandary» atty kitaptar men «Qasietti Qazaqstan» atty entsiklopediianyń I tomy jaryq kórdi», - dedi.
Sonymen qatar Respýblikalyq forým aiasynda «Rýhani jańǵyrý» atty kórme ashyldy. Kórmege tarihi qundy jádigerler qoiylǵan.
Qazaqstan Respýblikasynyń Mádeniet jáne sport ministrliginiń qoldaýymen «Saqtar qazynasy» atty erekshe qoimanyń ashylý saltanaty ótti. Erekshe qoimany tamashalap kelýshilerdiń nazaryna birinshi ret saq, sarmat dáýirine jatatyn jádigerlerdiń túpnusqalary usynyldy.
2017 jyly jasalǵan negizgi jumystardyń biri - Qazaqstannyń qasietti nysandary boiynsha respýblikalyq etnomádeni ekspeditsiialar. Forýmda atalǵan ekspeditsiia men basqa da izdenister negizinde jasalǵan jumystar:
«Qazaqstannyń jalpyulttyq qasietti nysandary», «Qazaqstannyń óńirlik qasietti nysandary» atty kitaptar men «Qasietti Qazaqstan» atty entsiklopediianyń I tomynyń tusaýy kesildi.
* Jalpy ulttyq mańyzy bar obektiler boiynsha «Qazaqstannyń qasietti jerleriniń geografiiasy» kóp fýnktsionaldy virtýaldy kartasy tanystyryldy.
* Óńirlik mańyzy bar obektiler boiynsha «Qazaqstannyń qasietti jerleriniń geografiiasy» interaktivtik karta halyq nazaryna usynyldy.
* Áleýmettik jeliler úshin Qazaqstannyń jalpy ulttyq qasietti obektileri týraly qazaq, orys jáne aǵylshyn tilderindegi 40 sekýndtyq hronometrajdy mobildi formattaǵy beinerolikter jurtshylyqqa tanystyryldy.
Óńirde júrgen bir top ólketanýshylar tuńǵysh ret jaryqqa shyqqan «Úzdik ólketanýshy» estelik medalimen marapattaldy. Sondai-aq, oblystyq mýzei direktorlary men basqa da mádeniet qyzmetkerleri Qazaqstan Respýblikasy Mádeniet jáne sport Ministriniń Qurmet Gramotasy men Alǵys hattaryna ie boldy.
