7 baǵytqa arnalǵan búkil qazaqstandyq ekspeditsiiaǵa daiyndyq júrgizilýde. Bul týraly búgin Aqordada ótken Rýhani jańǵyrý jónindegi ulttyq komissiia otyrysynan keiin BAQ ókilderine suhbat bergen QR Mádeniet jáne sport ministri Arystanbek Muhamediuly málim etti, dep habarlaidy "Ult aqparat".
«Qoǵamdyq sanany jańǵyrtý baǵdarlamasyn tabysty júzege asyrar bolsaq, Elbasymyz aitqandai Qazaqstannyń bolashaǵy múldem basqasha bolady. Óitkeni, ár halyqty onyń rýhani bailyǵy men sana-sezimi qalyptastyrady. Al bul baǵdarlama bizdiń sana-senimimizdiń joǵarylaýyna, óz qundylyqtarymyzdy saqtaýǵa septigin tigizip, dúniejúzinde qazaq kim degende «men» dep maqtanyshpen aitatyndai jaǵdaiǵa jetkizýi tiis», - dedi ministr.
Osy rette Arystanbek Muhamediuly qazirdiń ózinde mádeniet, sport, óner syndy salalarda zor jetistikterimiz bar ekendigin basa aitty.
«Dimash Qudaibergenuly syndy jas ánshilerimiz búkil dúniege tanymal. Máselen, 300 qytai jinalyp alyp, qazaq tilinde «Daididaý» ánin oryndady. Munyń barlyǵy úlken maqtanysh. Biz (ózimizdiń azamattarymyzǵa) qazaq tilin úirenińder deimiz. Al basqa ulttyq ókilderi osyndai jastarymyzdyń arqasynda qazaq tilin ózderi-aq úirenip jatyr», - dep atap ótti ol.
Onyń aitýynsha, «Qazaqstannyń kieli jerleriniń geografiiasy» jobasy aiasynda elimizdiń óńirlerinde jastar elimizdiń tarihi aimaqtaryna ekspeditsiialar uiymdastyrý ústinde. Al Mádeniet jáne sport ministrligi bolsa jaz aiynda 7 baǵytqa arnalǵan búkil qazaqstandyq ekspeditsiia daiyndaýda.
