Qazaqstan halyq ártisi, Memlekettik syilyqtyń laýreaty, ánshi Roza Rymbaeva sailaýda daýys berdi, dep habarlaidy QazAqparat tilshisi.
Búgin ol Almaty qalasyndaǵy QR Ulttyq kitaphanasynda ornalasqan №254 sailaý ýchaskesine azamattyq belsendiligin kórsetýge keldi.
«Qazaqstannyń ár azamaty óz tańdaýyn jasaýy kerek. Ár jańa basshy óz baǵdarlamasyn jasaidy, el bolashaǵyna óz baǵytyn beredi. Biz - halyq, basshylyqtyń jasaǵan baǵdarlamasyna qoldaý bildiremiz. Ári nátije kútemiz. Prezidenttikke kandidat azamattardyń barlyǵynyń negizgi maqsaty memleketti, halyqty jaqsy ómirge jetkizý, ómirimizdi jaqsartý. Búgin halyq tańdaǵan azamat jeńedi dep oilaimyn», - dedi Roza Rymbaeva.
Ánshiniń balalary da tańerteńnen sailaý ýchaskelerine ketken.
«Meniń uldarym Temirbek Júrgenov atyndaǵy Óner Akademiiasynda ornalasqan ýchaskede daýys berip jatyr. Men azamattardyń barlyǵyn jaqsy bilemin dep aita almaimyn. Biraq, keibireýleriniń baǵdarlamasyn tolyq oqyp shyqtym, jeke de tanyspyn. Sol adamǵa daýys berdim», - dedi ánshi.
Aimaqtyq sailaý komissiiasynyń tóraiymy Janna Asanovanyń aitýynsha, qalada 554 sailaý ýchaskesi ashylǵan. Sailaý ýchaskelerinde 1 mln-ǵa jýyq Almaty turǵyny tizimdelgen.
«Ózderińiz baiqaǵandaryńyzdai, belsendilik óte joǵary. Keshke deiin azamattardyń saiasi belsendiligi budan da arta túsedi dep oilaimyn», - dedi ol.
Qalaǵa 80 halyqaralyq baqylaýshy kelgen.
Qala boiynsha búginde 1 million 130 myń 792 sailaýshy tirkelgen.
Eske sala ketsek, búgin Qazaqstan Prezidentin kezekten tys sailaý bastaldy. QR Prezidentiniń kezekten tys sailaýynda el ishinde jáne shet elderde 9 968 daýys berý ýchaskesi jumys isteidi. Sailaý týraly Konstitýtsiialyq zańǵa sáikes, daýys berý ýaqyty standartty (saǵat 7.00-20.00 aralyǵy) bolady.
