Qazaqstannyń bolashaǵyna, keleshek kelbetine qatysty máselelerde baisaldy áńgime qajet. Bul týraly búgin Senat janynan qurylǵan «Ulttyq múdde» dialog alańynyń birinshi otyrysynda Májilis depýtaty Darhan Qydyráli aitty, dep habarlaidy QazAqparat.
«Shyn máninde mundai dialog alańy kerek jáne onyń «Ulttyq múdde» dep atalýy óte oryndy. Óitkeni árkimde pliýralizm qaǵidatymen túrli pikir bolýy tiis. Bir bárimizdiń at bailar altyn qazyǵymyz, ortaq qundylyǵymyz – ulttyq múdde. Qazirgi geosaiasi jaǵdai da, elimizdegi ahýal da sony kórsetip otyr. Sózime kirispes buryn qańtar oqiǵasyna qatysty bir aýyz toqtalyp ketsem be deimin. Sebebi tarihshy retinde, jalpy qazirgi tóńiregimizdegi ahýaldardan da jaqsy kórip otyrmyz. Tóńkeris, bilikti kúshtep basyp alý - jalpy adam quqyqtaryna eń úlken qiianat, ádilettilikke eń úlken qiianat. Eger tóńkeris júzege asqanda, onda elimiz birinshiden artqa ketetin edi. Ekinshiden, eldiń abyroiyna úlken nuqsan keler edi. Jáne de bul úlken sozylmaly dertke ainalar edi. Mysaly, Túrkiiada on jyl saiyn tóńkeris bolyp turdy. Odan endi ǵana qutylyp jatyr. Tóńkeriske toitarys berý arqyly Memleket basshysy óziniń demokratiialyq qaǵidattarǵa, saiasi reformalarǵa qanshalyqty tabandy kúresetinin aiqyndap berdi. Ony keshe Joldaýda da anyq ańǵardyq, Joldaý - uzaqmerzimdi Qazaqstannyń bolashaǵyn aiqyndaityn strategiialyq qoǵamǵa qujat», - dedi Darhan Qydyráli.
Osy oraida ol eki máselege kóńil aýdartty.
«Birinshisi - buqaralyq aqparat quraldarynyń mańyzy. Media nemese kommýnikatsiialyq quraldar qazirgi kezeńde óte mańyzdy. Búginde zań jobasynyń qajettiligi talassyz. Sóz bostandyǵy, oidyń erkindigi qamtamasyz etilýi kerek. Muny anyq sezinip jatyrmyz. Ótkir ózekti materialdar óte kóp. Ol elimizdiń reformalaryna úlken úles qosady dep senemin. Bir aitatyn nárse, tapsyrystardan nemese BAQ-tarda bet jyrtysýdan mádeniettilikke, bilimdilikke kóshsek degen oi. Sebebi qazir áleýmettik jeli shyn máninde jelókpe sózdiń ortalyǵyna ainalyp jatady. Qoǵamnyń saiasilanyp bara jatqany da belgili. Sondyqtan bizge bul kezeńde, jolairyqta biliktilik, mádeniettilik, ádilettilik pen jaýapkershilik asa mańyzdy dep oilaimyn», - dedi ol.
Onyń atap ótýinshe, búgingi bas qosý da osy azamattyq qoǵamnyń kórinisi.
«Muny turaqty júrgizilip tursa dep oilaimyn. Bul Joldaýdy qoldaý emes, Joldaýdy taldaý jáne onyń bolashaǵyn aiqyndaýǵa úles qosady. Óitkeni baisaldy áńgime qazirgi kezeńde kerek. Ásirese, ziialy qaýymǵa degen senimge selkeý tústi. Sondyqtan jańa Qazaqstanda jańa ziialy ósip shyǵýy kerek. Ol jaltaq emes, jaǵympaz emes, jańa seriialar bolýy kerek. Jańa sóz aitylýy tiis. Bizde kóbine «órt sóndirýishi» sekildi problema shyqsa, sony basýǵa tyrysamyz. Al shyn máninde Qazaqstannyń bolashaǵy qandai bolady, keleshek kelbeti qalai bolady, ulttyń bolmysy qalai qalyptasýy kerek degen máselelerde baisaldy áńgime qajet. Sondyqtan búgingi áńgime, dialog alańy atyna zaty sai ulttyq múddege qyzmet etetin úlken minberge ainalady dep oilaimyn. Jáne de Senattyń janynan qurylýy da buǵan múmkindik beredi», - dedi Darhan Qydyráli.
