8 maýsymda Qazaqstan astanasynda Eýropalyq odaqtyń Ortalyq Aziia boiynsha arnaiy ókili Piter Býrian qazaqstandyq jetekshi BAQ ókilderimen kezdesti, dep habarlaidy "Ult aqparat".
Joǵary shendi eýropalyq diplomat bizdiń elde úsh kúndik saparmen júr. Onyń jumys baǵdarlamasynda Syrtqy ister ministri Muhtar Tileýberdimen, QR Prezidentiniń Halyqaralyq yntymaqtastyq jónindegi arnaiy ókili Erjan Qazyhanovpen, Parlament depýtattarymen jáne biznes ókilderimen kezdesý bar.
Jýrnalisterdi ekonomikalyq, saiasi jáne gýmanitarlyq sipattaǵy máseleler, EO arnaiy ókiliniń Eýroodaqpen odan ári yntymaqtastyq perspektivalaryna kózqarasy qyzyqtyrdy.
Piter Býrian Prezident Qasym-Jomart Toqaevtyń júrgizip jatqan saiasi reformalaryna oń baǵa berip, EO-nyń Qazaqstanǵa áleýmettik-ekonomikalyq ózgerister protsesinde qoldaý kórsetýge daiyn ekenin atap ótti.
Saýda-ekonomikalyq qatynastardy keńeitý perspektivalary týraly kóp aityldy. Sonymen qatar, eýropalyq diplomat qazaqstandyq qazba otynnyń Eýropalyq odaq elderine importy birtindep qysqaratyny týraly eskertti.
«Biz «jasyl ekonomikaǵa» kóshýimizge bailanysty qazba otynynyń importy birtindep tómendeitinin jasyrmaimyz. Soǵan qaramastan, biz jańartylatyn energiia kózderin damytýdyń jańa múmkindikterin kórip otyrmyz», - dedi ol.
Degenmen, EO bizdiń elimizdiń jetekshi investitsiialyq seriktesi bolyp qalýdy josparlap otyr. Piter Býrian investitsiialyq yntymaqtastyqty odan ári damytý máseleleri boiynsha dialog alańy aiasyndaǵy birlesken jumystyń mańyzyn aityp ótti.
«Sizderdegi ekonomika kóbirek investitsiia qabyldaýǵa daiyn, Premer-Ministr bastaǵan alań jaqsy jumys istep, basym mindetterdi aiqyndady», - dedi ol.
Saýda-ekonomikalyq qatynastardy keńeitý taqyrybyn jalǵastyrý úshin Aqtaý teńiz portyn damytýdy qosa alǵanda, Eýropaǵa júk jetkizý úshin tiisti infraqurylym salý máselesi qoiyldy. Piter Býrian osy turǵyda EQYU-nyń 2019 jyldyń jazynan beri júzege asyrylyp kele jatqan «Jasyl porttar» jobasyn eske saldy.
«Biz EQYU-nyń «jasyl porttardy» damytý jónindegi bastamasyn qoldaimyz. Kaspii teńiziniń porttary Eýropalyq odaqtyń Eýropa men Aziiany jalǵaý jónindegi strategiiasynyń pilottyq jobalary bolýy múmkin. 1990 jyldary bastalǵan TRASEKA jobasymen jaqsy negiz qalandy», - dedi ol.
BAQ-ty qyzyqtyrǵan máselelerdiń biri Qazaqstan azamattary úshin EO-nyń vizalyq rejimin yryqtandyrý boldy. Joǵary dárejeli eýropalyq diplomat máseleniń egjei-tegjeiine úńilmei, taraptar osy taqyryp aiasynda jumysty jalǵastyryp, «qajetti maqsatqa qarai jyljyp kele jatqanyn» aitty.
EO-nyń Ortalyq Aziia boiynsha arnaiy ókili qyrǵyz-tájik shekarasyndaǵy qarýly qaqtyǵysqa pikir bildirip, Qazaqstan Prezidenti Qasym-Jomart Toqaevtyń ony retteýge járdemdesý týraly usynysyn joǵary baǵalady.
