Osy aptada Qazaqstannyń birneshe oblysyna sý basý qaýpi tónip otyr, dep habarlady Qazaqstannyń IIM tótenshe jaǵdailar komitetiniń tóraǵasy Vladimir Bekker. Úlken sý 7 sáýirde kelýi múmkin.
"Qoldaǵy boljaý málimetterine sáikes, osy jyldyń 7-8 sáýirinen bastap Qaraǵandy, Aqmola, Qostanai, Pavlodar jáne Soltústik Qazaqstan oblystarynda sý tasqyny bolady. Atalǵan óńirlerde jaǵdai qiyndaýy múmkin. "Qazgidromet" RMK sáýirde jaýyn-shashyn normadan kóp túsedi dep boljap otyr. Jaýyn-shashyn 8, 9, 10 jáne 11 sáýirde túsedi degen boljam bar", — dep málimdedi ol brifingte.
Bekker Shyǵys Qazaqstan oblysyndaǵy jaǵdai áli de kúrdeli ekenin atap ótti. Zyrian aýdanynda 107 úidi sý basyp tur.
22 aqpan men 5 sáýir aralyǵynda kún kúrt jylynyp, qardyń jyldam erýi saldarynan elimizde 1 500 úi sýda qaldy. Sý ShQO, Almaty, Jambyl, Qaraǵandy oblystary men Almaty qalasynyń 50 eldi mekenine keldi.
Tórt myńnan astam adamdy kóshirýge týra kelgen, onyń úsh myńnan astamy óz úiine oraldy.
«Kórsetilgen oblystyń ákimdikteri ótken jyly sý tasqynynyń aldyn alý men saldaryn joiý boiynsha respýblikalyq jol karasy aiasynda 43 shara júrgizgen edi. Qaraǵandy oblysynyń Buqar jyraý, Shet, Nura, Qarqaraly aýdandarynda jergilikti biýdjet esebinen jalpy uzyndyǵy 55 shaqyrym bolatyn bógetter men úiindi topyraqtar turǵyzyldy. Bul arqyly jyl saiyn sý basatyn 12 eldi mekendegi qaýip seiildi», - dedi ol.
Aita keteiik, respýblikadaǵy qutqarýshylardy qosymsha qural-jabdyqtarmen jasaqtaý úshin Úkimet rezervinen 4,3 mlrd teńge kóleminde qarajat bólý máselesi qarastyrylyp jatyr.
Ult aqparat
