Qazaqstanda Almaty oblysynyń turǵyndary basqa óńirlerdiń eńbekke jaramdy turǵyndaryna qaraǵanda kóp tabys tabady, dep habarlaidy "Ult aqparat".
Finprom.kz málimetterine sáikes, Qazaqstanda eresek turǵyndardyń sany 12,1 mln adamdy quraidy. Al sonyń 162-i el bailyǵynyń jartysynan kóbine ielik etip otyr. Aitalyq, 11,7 mln adamnyń nemese eldiń eresek turǵyndarynyń 96,6 paiyzy jylyna 10 myń dollarǵa jetpeitin tabys tapsa, 2,7 paiyz nemese 326 322 azamattyń jylyna 10 myńnan 100 myń dollarǵa deiin tabysy bar. Bir jylda 100 myńnan 1 million dollarǵa deiin tabys tabatyndardyń sany 42 301 (0,35) adam. Al 1 millionnan 50 million dollarǵa deiin tabysy bar 5 838 (0,05) adam bar. Qazaqstan bailyǵynyń 55 paiyzyn ýysynda ustap otyrǵan 162 adamnyń (0,001 paiyz) 112-si jylyna 50 millionnan 80 mln dollarǵa deiin, 45-i 80 millionnan 800 mln dollarǵa deiin, 5-eýi 2 milliardtan 3 mlrd dollarǵa deiin tabys tabady.
Osy jyldyń 2-toqsanynda halyqtyń ortasha aqshalai tabysy 169,5 myń teńge boldy. Bul ótken jyldyń dál osyndai kezeńimen salystyrǵanda 10,3 paiyzǵa (153,7 myń teńge) kóp. Óńirlik shekte Almaty turǵyndary barynsha kóp tabys tabady – 234,9 myń teńge (bir jyl buryn 218,8 myń teńge bolǵan edi). Al elordalyqtardyń ortasha tabysy 226,7 myń teńge (1 jyl buryn 213,5 myń teńge) bolsa, Qaraǵandy oblysy turǵyndarynyń tabysy bir jylda 9,4 paiyzǵa ósip 199,7 myń teńgege (bir jyl buryn 182,6 myń teńge) jetip otyr.
Turǵyndarynyń tabysy mol TOP-5 óńirge Mańǵystaý men Shyǵys Qazaqstan oblystary da kirip otyr. Bul óńirlerdiń turǵyndary tiisinshe 198,4 myń jáne 191,7 myń teńge tabys tabady. Elimizdiń 8 óńiri turǵyndarynyń tabysy ortasha respýblikalyq mánnen birshama tómen. Turǵyndarynyń tabysy tómen óńirlerdiń qatarynda Túrkistan (100,4 myń teńge), Jambyl (128,1 myń teńge) jáne Qyzylorda oblystary (137,7 myń teńge) bar.
