Foto: Nur.kz
Qazaqstannyń eńbek naryǵyn damytý jáne kadrlyq áleýetin nyǵaitý taqyrybyndaǵy Úkimet saǵatynda Eńbek jáne halyqty áleýmettik qorǵaý ministri Svetlana Jaqypova baiandama jasap, birqatar másele kóterdi. Aitýynsha, Qazaqstannyń eńbek naryǵynyń turaqty ósýine qaramastan, memlekettiń teń múmkindikterdi qamtamasyz etip, ómir súrý sapasyn arttyrýy úshin odan ári kúsh salýdy talap etetin birqatar osal tustar anyqtalǵan.
«Birinshisi – eńbek naryǵynda usynystardy jasaý. Máselen, memleket kásipkerlikti damytýǵa jáne indýstriialandyrýǵa baǵyttalǵan baǵdarlamalardy iske asyrýda. Alaida, sońǵy 10 jylǵy statistika kórsetkendei, bul baǵdarlamalardyń áseri jetkiliksiz. Degenmen, memlekettiń ekonomikany yntalandyrý boiynsha qabyldaǵan belsendi sharalaryna qaramastan, jeke biznestiń jańa jumys oryndaryn qurýǵa qosqan úlesi shamamen 20 paiyzdy ǵana quraidy. Bul Ekonomikalyq yntymaqtastyq pen damý uiymy elderimen salystyrǵanda 4 ese az», - dedi S. Jaqypova.
Tiisinshe, búginde jumys oryndarynyń ósimin ónimdiligi tómen salalar men memlekettik sektor qamtamasyz etýde. Bul protsestiń janama saldary – Qazaqstannyń EYDU elderinen eńbek ónimdiligi boiynsha úsh ese artta qalǵany.
«Ekinshi syn-qater – formaldy emes jumyspen qamtýdyń joǵary deńgeii. 2023 jyly naqty zeinetaqy aýdarymdarynyń derekteri boiynsha eseptelgen eńbekaqy tóleý qorynyń kólemi 20 trln teńgeni qurady. Óz kezeginde, Ulttyq statistika biýrosynyń baǵalaýynsha eńbekaqy tóleý qory eki ese kóp – 38 trln teńge. Eńbekaqy qory boiynsha derekterdiń edáýir alshaqtyǵy saýda, aýyl sharýashylyǵy jáne jyljymaityn múlik sektorlarynda baiqalady. Ministrliktiń ai saiynǵy derekqor monitoringi ulttyq jobalar sheńberinde jumysqa ornalastyrylǵan árbir tórtinshi adamnyń mindetti zeinetaqy jarnalary joq ekenin kórsetip otyr», - dedi Eńbek ministri.
Sonymen birge, ekonomikanyń orta kásiptik bilimi bar kadrlarǵa qajettiligi artyp keledi. Bul rette biznes tarapynan suranys pen jumys kúshine usynys arasyndaǵy sáikessizdik baiqalyp otyr.
«Kásiptik-tehnikalyq bilimi bar mamandarǵa suranys joǵary bilimi bar túlekterge qajettilikten 70% artyq. Biliktiligi ortasha jáne joǵary deńgeidegi jumys kúshine usynys kólemi birdei bolyp qalýda», - dedi S. Jaqypova.
