«Qazaqstannyń eńbek sińirgen ustazy» marapatyn taǵaiyndaý sharalary barynsha ashyq júrgizilýi kerek. Bul týraly Qazaq ulttyq óner ýniversitetiniń ujymymen kezdesýinde Parlament Májilisi Áleýmettik-mádeni damý komitetiniń tóraiymy Gúlshara Ábdiqalyqova málim etti, dep habarlaidy QazAqparat.
Júzdesý barysynda depýtat «Pedagog mártebesi týraly» Zańynyń negizgi jańashyldyqtary týraly aityp berdi. Sonymen qatar, «Qazaqstannyń eńbek sińirgen ustazy» marapatyn taǵaiyndaý sharalary týraly pikir almasý boldy. Bul turǵyda ýniversitet oqytýshylary atalǵan marapatty taǵaiyndaýda barynsha ashyqtyqty qamtamasyz etý qadamdaryn pysyqtaý kerektigin atap ótti.
«Osyndai qurmetti ataqtar berilgende ashyqtyqty qamtamasyz etý kerek. Bul sharalarda barlyq kafedralar men dekanattar qamtylsa degen tilek bar. Iaǵni laiyqty adamdy ózimiz aramyzdan sailasaq durys bolar edi», - dedi ýniversitet ustazy.
Óz kezeginde G. Ábdiqalyqova ashyqtyqty qamtamasyz etýde oqytýshylardyń usynystarymen kelisetinin aitty.
«Jalpy, «Qazaqstannyń eńbek sińirgen ustazy» jáne «Jyl ustazy» degen túrli marapattaýlardy bergen kezde barlyq sharalar ashyq bolýy kerek. Qazirgi kezde Bilim jáne ǵylym ministrligi arnaiy ereje daiyndap jatyr. Osy oraida sizdiń usynysyńyzdy eskerý kerektigin aitamyz», - dedi depýtat.
Aita keteiik, «Pedagog mártebesi týraly» Zańy boiynsha halyqaralyq konkýrsttar men jarystardyń jeńimpazdaryn, túrli olimpiadalar men sporttyq jarystardyń laýreattaryn daiarlaǵan pedagogterge 3 laýazymdyq jalaqyǵa deiin birjolǵy syiaqy tólenedi.
«Qazaqstannyń eńbek sińirgen ustazy» memlekettik marapat taǵaiyndalady jáne iegerlerine 1000 AEK mólsherinde birjolǵy syiaqy beriledi.
