Eýropalyq odaqtyń Ortalyq Aziiaǵa baǵyttaityn investitsiiasy arta túsedi. Bul týraly Bishkekte «Eýropalyq Odaq – Ortalyq Aziia» ekonomikalyq forýmynan keiin Eýropalyq komissiianyń vitse-prezidenti Valdis Dombrovskis aitty, dep habarlaidy QazAqparat tilshisi.
«Qazaqstan Ortalyq Aziiadaǵy eń úlken ekonomika ekeni belgili. Osy oraida ekonomikalyq damý deńgeii, jan basyna shaqqandaǵy jalpy ishki ónim kólemi boiynsha óńirdegi ekonomikalyq eń damyǵan el bolyp otyr. Sondyqtan aldaǵy ýaqytta da Qazaqstan úshin damý áleýetiniń múmkindigi joǵary. Bul turǵyda Eýropalyq odaq tarapynan tiisti qoldaý jasaýǵa daiynbyz», - dedi Valdis Dombrovskis tilshiler saýalyna jaýap bere otyryp.
Sonymen qatar ol 2023 jyly «Eýropalyq Odaq – Ortalyq Aziia» ekinshi ekonomikalyq forýmynyń Qazaqstanda ótýi bastamasyn qoldaitynyn jetkizdi.
«Eýropalyq odaqtyń Ortalyq Aziiaǵa baǵyttaityn investitsiiasy arta túsedi. Biz energetika, kólik jelisi boiynsha jumystardy jalǵastyrmaqpyz, sondai-aq jeke jobalar da barshylyq. Qazaqstan Premer-Ministri Asqar Maminmen kezdeskende túrli salalardaǵy yntymaqtastyqty talqyladyq. Bizdiń elder arasyndaǵy saýda ári investitsiialyq aǵyndar ózgeretini anyq», - dedi Valdis Dombrovskis.
Budan buryn habarlanǵandai, biyl 5 qarashada Bishkekte Premer-Ministrler deńgeiinde «Eýropalyq Odaq – Ortalyq Aziia» ekonomikalyq forýmy ótti.
