ەۋروپالىق وداقتىڭ ورتالىق ازيياعا باعىتتايتىن ينۆەستيتسيياسى ارتا تٷسەدٸ. بۇل تۋرالى بٸشكەكتە «ەۋروپالىق وداق – ورتالىق ازييا» ەكونوميكالىق فورۋمىنان كەيٸن ەۋروپالىق كوميسسييانىڭ ۆيتسە-پرەزيدەنتٸ ۆالديس دومبروۆسكيس ايتتى, دەپ حابارلايدى قازاقپارات تٸلشٸسٸ.
«قازاقستان ورتالىق ازيياداعى ەڭ ٷلكەن ەكونوميكا ەكەنٸ بەلگٸلٸ. وسى ورايدا ەكونوميكالىق دامۋ دەڭگەيٸ, جان باسىنا شاققانداعى جالپى ٸشكٸ ٶنٸم كٶلەمٸ بويىنشا ٶڭٸردەگٸ ەكونوميكالىق ەڭ دامىعان ەل بولىپ وتىر. سوندىقتان الداعى ۋاقىتتا دا قازاقستان ٷشٸن دامۋ ەلەۋەتٸنٸڭ مٷمكٸندٸگٸ جوعارى. بۇل تۇرعىدا ەۋروپالىق وداق تاراپىنان تيٸستٸ قولداۋ جاساۋعا دايىنبىز», - دەدٸ ۆالديس دومبروۆسكيس تٸلشٸلەر ساۋالىنا جاۋاپ بەرە وتىرىپ.
سونىمەن قاتار ول 2023 جىلى «ەۋروپالىق وداق – ورتالىق ازييا» ەكٸنشٸ ەكونوميكالىق فورۋمىنىڭ قازاقستاندا ٶتۋٸ باستاماسىن قولدايتىنىن جەتكٸزدٸ.
«ەۋروپالىق وداقتىڭ ورتالىق ازيياعا باعىتتايتىن ينۆەستيتسيياسى ارتا تٷسەدٸ. بٸز ەنەرگەتيكا, كٶلٸك جەلٸسٸ بويىنشا جۇمىستاردى جالعاستىرماقپىز, سونداي-اق جەكە جوبالار دا بارشىلىق. قازاقستان پرەمەر-مينيسترٸ اسقار مامينمەن كەزدەسكەندە تٷرلٸ سالالارداعى ىنتىماقتاستىقتى تالقىلادىق. بٸزدٸڭ ەلدەر اراسىنداعى ساۋدا ەرٸ ينۆەستيتسييالىق اعىندار ٶزگەرەتٸنٸ انىق», - دەدٸ ۆالديس دومبروۆسكيس.
بۇدان بۇرىن حابارلانعانداي, بيىل 5 قاراشادا بٸشكەكتە پرەمەر-مينيسترلەر دەڭگەيٸندە «ەۋروپالىق وداق – ورتالىق ازييا» ەكونوميكالىق فورۋمى ٶتتٸ.
