Qazaqstannyń birneshe oblysy boiynsha poiyzdardyń júrý jiiligi qysqardy, dep habarlaidy "Ult aqparat" «Jolaýshylar tasymaly» AQ baspasóz qyzmetine silteme jasap.
Baspasóz qyzmetiniń málimetterine qaraǵanda, Soltústik Qazaqstan, Aqmola, Qostanai jáne Pavlodar oblystary boiynsha «COVID-19» koronavirýsynyń taralýyn boldyrmaý maqsatynda QR aýmaǵynda koronavirýstyq infektsiianyń týyndaýy men taralýyna jol bermeý jónindegi vedomstvo aralyq kommissiia sheshimine jáne QR Indýstriia jáne infraqurylymdyq damý ministrliginiń hatyna sáikes kelesi jolaýshylar poiyzdarynyń jol júrý jiiligi qysqarady:
1) Aǵymdaǵy jyldyń 9 qarashasynan bastap №705/706 «Almaty-Petropavl» jolaýshylar poiyzy kún ara qatynaityn bolsa, №31/32 «Pavlodar – Almaty» jolaýshylar poiyzy belgilengen kúnder boiynsha qatynaityn bolady.
2) Keibir oblystarda barlyq stansalarǵa biletter satýǵa jáne jolaýshylardy otyrǵyzýǵa/túsirýge ýaqytsha tyiym salynady:
a) Aqmola oblysynda Atbasar, Ereimentaý, Arshaly stansalarynan, 1, 2 jáne 3-synypty vokzaldar ornalasqan Býrabai, Esil, Makinka, Aqkól, Jaltyr jáne Kókshetaý kýrorttaryn qospaǵanda;
b) Pavlodar oblysynda Pavlodar, Ekibastuz, Aqsý-2 jáne Bozshakól stansalaryn qospaǵanda;
c) Qostanai oblysynda Qostanai, Tobyl, Qusmuryn, Esil, Arqalyq jáne Jelezorýdnaia stansalaryn qospaǵanda;
d) Soltústik Qazaqstan oblysynda barlyq stansalar arqyly jolaýshylardy otyrǵyzýǵa/túsirýge tranzittik jolaýshylar poiyzdarynyń qozǵalysyna tyiym salynady.
Sonymen qatar, № 68/67 «Nur-Sultan Nurly jol - Óskemen-1» jolaýshylar poiyzynyń aptasyna bir ret jol júrý merzimi jáne № 351/352 «Almaty-2 - Óskemen-1» jolaýshylar poiyzynyń aǵymdaǵy jyldyń sońyna deiin ýaqytsha kún ara qatynaýy uzartyldy.
Petropavl stansasynan jolaýshylar tasymalynyń poiyzymen shyǵý úshin nátije berilgen kúnnen bastap 3 táýlikten aspaityn teris nátijeli COVID-19-ǵa PTR testileýden ótkeni týraly anyqtama mindetti túrde bolýy qajet. Covid-19-ǵa PTR testileýden ótkeni týraly anyqtama bolmasa jolaýshylar vagonǵa otyrǵyzýǵa jiberilmeidi, sondai-aq temirjol vokzaldary ǵimarattaryna kútip alýshylar men shyǵaryp salýshylarǵa kirýge tyiym salynady.
Petropavldan jolaýshylar poiyzdarynda qoǵamdyq tamaqtaný obektileriniń qyzmetin uiymdastyrý kóliktegi Bas memlekettik sanitarlyq dárigerdiń qaýlysynyń talaptaryna sáikes qamtamasyz etiledi.
Jol júrý qujattaryn (biletterin) toqtatylǵan poiyzdar men tyiym salynǵan turaqtarǵa resimdegen, sondai-aq COVID-19-ǵa PTR testileýden ótkeni ne onyń jaramsyzdyǵy týraly anyqtamasy bolmaǵan jolaýshylar jol júrý qujattaryn (biletterin) qaitaryp jáne aqshalai qarajattaryn tolyq kólemde qaitaryp alady.
Biletterdi qaitarý jolaýshylardy tasymaldaý erejesinde kózdelgen merzimde bilette kórsetilgen stansadan poiyz jóneltilgen sátten bastap 1 saǵattan keshiktirilmei júrgiziledi. Tólemderdi qaitarý biletti qaitarý tártibi men satyp alý tásiline qarai qolma-qol jáne qolma-qol aqshasyz esep aiyrysý arqyly júrgiziledi.
«Jolaýshylar poiyzdarynyń qozǵalys kestesi boiynsha barlyq anyqtamalyq aqparatty «105» nómiri arqyly bilýge bolady. Jolaýshylardan qabyldanyp jatqan sharalarǵa túsinistikpen qarap, koronavirýstyq pandemiianyń taralýy kezeńinde sanitarlyq-epidemiologiialyq talaptardy saqtaýlaryn suraimyz»,-delingen habarlamada.
