Elimizdiń barlyq óńirinde agroónerkásip kesheni salasyndaǵy ekojúie qurylady. Bul týraly halyqqa esep berý kezdesýinde QR Aýyl sharýashylyǵy ministri Saparhan Omarov aitty, dep habarlaidy QazAqparat.
«Agroónerkásip kesheni salasyndaǵy óndiris kólemin arttyrý maqsatynda búkil respýblikada aldaǵy 5 jyldyń ishinde jalpy somasy 4,5 trln teńgeni quraityn 845 investitsiialyq jobany júzige asyrý josparlanǵan. Búginde atalǵan investitsiialyq jobalar óńir ákimderimen jáne investorlarmen pysyqtalǵan», - dedi ministr.
Onyń atap ótýinshe, tiisti jol kartalary da rásimdeldi. Atalǵan qujat aiasynda Aýyl sharýashylyǵy ministrligi jobalardyń júzege asyrylýyna monitoring jasap, baqylaý júrgizip otyr. Sonymen qatar ol Memleket basshysynyń tapsyrmasyna sáikes, et, jemis-jidek, kókónis, astyq jáne maily daqyldar, sút ónimderi óndirisin qamtityn iri investitsiialyq jobalardyń tóńireginde 7 ekojúie qurylatyndyǵyn atap ótti.
«Bul joǵary qosylǵan quny bar qazaqstandyq sońǵy ónimdi daiyndaýǵa alatyn keminde 350 myń fermerlik jáne úi sharýashylyqtaryn shoǵyrlandyrýǵa múmkindik beredi. Óńirlerdiń erekshelikterin eskere otyryp, eldiń barlyq aimaǵynda ekojúie qurylady», - dedi Saparhan Omarov.
