«Qazaqstan» teleradiokorporatsiiasy jańa maýsymdy birqatar ózgeristermen bastamaq. Bul týraly Ulttyq arnanyń resmi saitynda habarlandy.
28 tamyzda «Qazaqstan» teleradiokorporatsiiasynyń media resýrstarynda jańa maýsym bastalady. Jańa maýsym aiasynda teleradiokorporatsiia quramyna enetin arnalar men radiolarda aýqymdy ózgerister oryn alady: rebrending júrgizilip, stýdiialar jańartylyp, jańa baǵdarlamalar efirge qosylady. Rebrending barysynda - «Qazaqstan» korporatsiiasynyń mediaaktivterine ortaq, tanymal logotip bekitilip, reneiming, redizain jumystary júrgizildi.
Jańa logotip – korporatsiia quramyndaǵy arnalar men radiostantsiialardyń birtutastyǵyn bildiretin arnaiy belgi retinde – Qazaqstan Respýblikasynyń Memlekettik Týy ispetti jasaldy.
Jalpy jańa logotip – korporatsiianyń tehnologiialyq damýǵa umtylysyn, úlken media otbasy resýrstarynyń sabaqtastyǵyn bildiredi.
Logotip jobasyn tanymal qazaqstandyq rejisser jáne dizainer – Sáken Joldas daiyndady.
Jańa maýsymda korporatsiia quramyna enetin 14 aimaqtyq arnalardyń ataýlary da ózgertiledi. Burynǵy «Qazaqstan – Aqtaý», «Qazaqstan – Shymkent», «Qazaqstan – Qaraǵandy» jáne t.b. degen siiaqty ataýlardyń ornyna, endi jekelegen, sol aimaqqa úirenshikti ataýlar engiziletin bolady. Mysaly Mangystau, Ontustik, Saryarqa jáne t.b. Bul ózgertýler, aimaqtyq arnalarǵa ishki telenaryqta derbes jumys júrgizýge jáne aýditoriianyń keńeiýine baǵyttalǵan.
Odan bólek telearnalardyń grafikalyq bezendirilýi, mýzykalyq-toptamalary jáne «Qazaqstan» Ulttyq arnasynyń resmi daýysy da ózgerdi. Jalpy rebrendingtiń basty maqsaty - korporatsiianyń barlyq media aktivterine tán, ulttyq dástúrdi áigileitin, korporatsiianyń jańa álemdik standarttarǵa talpynysyn kórsetetin - birtutas tanymal belgi qurý.
Jańa maýsymda Qazaqstan Ulttyq arnasynda túrli baǵyttaǵy ondaǵan joba kórermenge jol tartady. Atap aitsaq, «Jibek joly juldyzy», «Men qazaqpyn» halyqaralyq mýzykalyq megajobalary, ulttyq estradany nasihattaityn - «Hit Qazaqstan» mýzykalyq án-sherýi jańa maýsymda efirge enedi. Oǵan qosa qoǵamdyq, intellektýaldyq baǵyttaǵy baǵdarlamalardyń sany artady. Búgingi zamannyń suranysyna sai keletin realiti - shoý janryndaǵy baǵdarlamalar kórsetiledi. Kásipkerlikti nasihattaityn - «Úmitker», tabiǵattyń tylsym kúshi men qudiretin kórsetetin - «24 saǵat tabiǵat qushaǵynda» ekshn realiti-shoýy, otbasylyq qundylyqtardy dáripteitin - «Ene men kelin».
Sonymen qatar, efirden birqatar derekti filmder toptamasy da oryn alady: Qazaqstannyń kópshilikke beimálim tarihy týraly áńgimeleitin - «Kieli Qazaqstan», sondai-aq, elimizdiń áigili adamdary jaily syr shertetin - «Uly dala ulaǵaty». Rebrending aiasynda burynǵy baǵdarlamalardyń da formaty ózgeredi. 28 tamyzdan bastap, «Qazaqstan» Ulttyq arnasy - «Alma TV», «ID TV» siiaqty eldegi iri kabeldik operatorlar arqyly HD formatta habar taratatyn bolady.
