Kaspii teńiziniń qazaqstandyq sektorynda áskeri teńizshiler zymyran-artilleriialyq korablder toptaryn jaýyngerlik jaǵdaida qoldaný is-qimyldaryn pysyqtaýda, dep habarlaidy QazAqparat.
«QR Qorǵanys ministrliginiń baspasóz qyzmetinen málim etkendei, Qarýly kúshterde jaýyngerlik oqý sharalary Qazaqstan Prezidentiniń armiianyń jaýyngerlik qabiletin túbegeili arttyrý jónindegi tapsyrmasyn iske asyrý sheńberinde ótkizilýde.
Oqý-jattyǵýǵa Áskeri-teńiz kúshteriniń bas qolbasshysy kontr-admiral Sáken Bekjanov basshylyq jasaýda», - delingen ministrlik málimetinde.
Manevrler barysynda ekipajdardyń daiyndyq deńgeii jetildirilýde. Sondai-aq Kaspii teńiziniń qazaqstandyq sektorynda eldiń aýmaqtyq tutastyǵyn, egemendigin jáne ekonomikalyq múddelerin qorǵaý jónindegi mindetterdi oryndaýdaǵy ózara is-qimyl tártibi pysyqtalyp jatyr.
«Oqý-jattyǵýda teńizde apatqa ushyraǵan kemege kómek kórsetý boiynsha ekipajdardyń qutqarý is-qimyldaryna erekshe nazar aýdarylǵan. Budan bólek, áskeri teńizshiler kemelerdi diversiiaǵa qarsy qorǵaý, ushqyshsyz basqarylatyn apparattar men shartty qarsylastyń katerlerine qarsy turý sharalaryn júrgizý ústinde», - dep naqtylady vedomstvodan.
