Búgin QR Parlamenti Senatynyń jalpy otyrysynda «Qazaqstan Respýblikasynyń Úkimeti men Amerika Qurama Shtattarynyń Úkimeti arasyndaǵy Konsýldyq artyqshylyqtar men immýnitetter týraly kelisimdi ratifikatsiialaý týraly» QR zańynyń jobasy qabyldandy, dep habarlaidy "Ult aqparat".
Zań jobasy boiynsha negizgi baiandama jasaǵan QR Syrtqy ister ministri Muhtar Tileýberdiniń aitýynsha, QR men AQSh arasyndaǵy yntymaqtastyq Qazaqstan Tuńǵysh Prezidenti - Elbasy Nursultan Nazarbaevtyń 2018 jylǵy AQSh-qa saparynyń qorytyndysy boiynsha ornatylǵan keńeitilgen strategiialyq seriktestik rýhynda damyp keledi jáne odan ary nyǵaiýda. Qazaqstan men AQSh arasynda barlyq deńgeide turaqty saiasi dialog júrgizilýde.
«Ótken jyldyń ishinde elimizdiń barlyq Ministrler kabineti AQSh-ta is-saparlarmen boldy jáne QR Premer-Ministriniń saparymen aiaqtaldy. Sonymen qatar osy jyldyń aqpan aiynda AQSh Memlekettik hatshysy Maik Pampeonyń Qazaqstanǵa resmi sapary ótti. Elbasy saparynyń qorytyndysy boiynsha San-Frantsiskoda QR Bas konsýldyǵyn ashý týraly sheshim qabyldandy. Osylaisha qazirgi ýaqytta AQSh aýmaǵynda Qazaqstanynyń eki Bas konsýldyǵy jumys isteidi. Al bizdiń elde AQSh tarapy úshin óńirlik hab qyzmetin atqaratyn Ortalyq Aziiadaǵy jalǵyz Almaty qalasyndaǵy AQSh-tyń bas konsýldyǵy bar»,- dedi ol.
Ministrdiń atap ótýinshe, ratifikatsiialanatyn kelisim konsýldyq laýazymdy tulǵalar men olardyń otbasy múshelerine diplomatiialyq immýnitetter men artyqshylyqtardy qamtamasyz etýge qatysty máselelerdi retteidi. 1961 jylǵy diplomatiialyq qatynastar týraly Vena konventsiiasyna sáikes, kelisim negizinde eki memlekettiń konsýldyq mekemeleriniń qorǵalatyn konsýldyq laýazymdyq tulǵalary, konsýldyq qyzmetshileri jáne olardyń otbasy músheleri zańdyq immýnitettermen qamtamasyz etiletin salyqtar men alymdardan ózara bosatylady.
«Eki eldiń ózara paidalanatyn immýnitetteri men artyqshylyqtaryn kúsheitý konsýldyq laýazymdy tulǵalardyń jáne konsýldyq qyzmetshilerdiń qyzmetine oń áserin tigizetin bolady. Sonymen qatar kelisimdi iske asyrý AQSh-ta QR azamttarynyń múddelerin usyný jáne qorǵaýdyń tiimdiligin arttyrady», - dedi Muhtar Tileýderdi.
Zań jobasy talqylanǵannan keiin senatorlar oǵan biraýyzdan qoldaý bildirdi. Osylaisha «Qazaqstan Respýblikasynyń Úkimeti men Amerika Qurama Shtattarynyń Úkimeti arasyndaǵy Konsýldyq artyqshylyqtar men immýnitetter týraly kelisimdi ratifikatsiialaý týraly» QR zańy qabyldandy.
