Májilis depýtaty Juldyz Súleimenova qala men aýyl mektepteri arasyndaǵy bilim alshaqtyǵyn synady, dep habarlaidy QazAqparat.
«Aýyldy jańǵyrtý týraly aitqanda, bilim salasyn damytýǵa basa kóńil bólý qajet. Qazirgi ýaqytta aýyl mektepterindegi oqýshylardyń bilim sapasy syn kótermeidi. Bul bilimdegi teńsizdikke ákelip otyr. Bilim berýdegi kez kelgen teńsizdik qoǵamdaǵy kúrdeli áleýmettik máselelerdiń ýshyǵýyna ákeletinin bárimiz jaqsy túsinemiz. Aýyl balalary fizikany, himiiany, biologiiany, zamanaýi zerthanalarda oqymaityn bolsa, nanotehnologiiany, biotehnologiiany bilmese, úiirmelerde emin-erkin sportpen shynyqpaityn bolsa, jalpy aýyl balasynyń ómirdegi básekege qabilettigi týraly aitý qiyn. Sondyqtan da bilim teńsizdigi ózekti másele», - dedi Súleimenova Májiliste ótken Úkimet saǵatynda.
Depýtat PISA reitinginiń 2018 jyldaǵy zertteý nátijesi boiynsha qala men aýyl arasyndaǵy bilim sapasynyń alshaqtyǵy 1,5 jyldan 4 jylǵa deiin sozylǵanyn atap ótti.
Al elimizde qala men aýyl arasyndaǵy alshaqtyq eń joǵary 6 oblys tirkelgen, olar – BQO, Jambyl, Aqtóbe, Túrkistan, Almaty, Atyraý, Mańǵystaý, Qyzylorda oblystary. Osy 6 oblystaǵy bilim standartynyń joǵary deńgeide qamtylýyn negizge alý qajet.
«Memleket basshysy óz Joldaýynda jalpy aýyl mektepterin jan basyna shaqqandaǵy qarjylandyrýǵa kóshý qajettigin aitty. Osy rette aýyl mektepteri jan basyna qarjylandyrýǵa qashan kóshedi? Sapaly bilim alý úshin bir balaǵa qansha qarajat jumsalatyn bolady? Taǵy bir úlken másele – sapaly pedagog mamandarmen qamtamasyz etý. Ulttyq ekonomika ministrligi qazir «Diplommen aýylǵa» jobasynyń ákimshisi. Biraq bul joba aýyl mektepterin sapaly pedagog kadrlamen qamtamasyz etýdi durys júzege asyrmai otyr. Qanshama qarajat bólingenimen, ol qarajattyń tiimdiligi jalpy aýyldy damytýǵa baǵyttalmai otyr. Ulttyq ekonomika ministrligi osy jumysty qolǵa alýy kerek», - dedi depýtat.
Óz kezeginde QR Ulttyq ekonomika ministri Álibek Qýantyrov «Aýyl – el besigi» jobasy boiynsha standarttar qaita qaralyp jatqanyn aitty.
«Demografiia birinshi basymdyq bolǵandyqtan, biz aýyl mektepterine qosymsha nazar aýdaramyz. «Aýyl – el besigi» jobasyna kelsek, biylǵy jylǵa 20 mlrd teńge bólinedi. Al 2024 jyldan 2025 jylǵa deiin 25 mlrd teńgege deiin respýblikalyq biýdjetten bólinetin qarajat ulǵaitylatyn bolady. Kei aýdandarda, kei óńirlerde mysaly BQO-da bólinetin biýdjettik kredit qazir turǵyn úige jetpeidi, ol da qaralyp jatyr, qazir ol tólemdi 1,5 myń AEK-ten 2 myń AEK-ke arttyrý máselesi talqylanyp jatyr. Bul da máseleni sheshýge kómektesedi dep oilaimyn», - dedi Ulttyq ekonomika ministri.
