QR Qarjy vitse-ministri Rýslan Eńsebaev «Halyq qatysatyn biýdjet» pilottyq jobasynyń qalai júrgizilip jatqanyn aityp berdi, dep habarlaidy QazAqparat.
Onyń aitýynsha, ashyq biýdjetterdiń negizgi baǵyttary biýdjetterdi qarastyrýǵa halyqtyń qatysý máselelerine qatysty.
«Qazaqstanda birqatar bastamalar júzege asyp jatyr. Atap aitqanda, interaktivti, grafikalyq nysanda aqparat usynylatyn azamattyq biýdjet uǵymy engizildi. «E-Qarjy ministrligi» jobasy aiasynda qarjylyq esep pen biýdjettiń atqarylýy boiynsha aqparat toptastyryldy. Endi aqparat Excel esepteri túrinde emes, qoljetimdi formatta usynylady. Bizde biznes nemese analitikalyq agenttikterdiń óz júiesinde derekkózderdi biriktiretin bastamalary bar. Biz derekter jiyntyǵyn keńeitý boiynsha jumys istep jatyrmyz. Ashyq biýdjetter portaly bar, onda memlekettik organdar Excel formasynda derekterdi qolmen toltyrady, bul aqparattyń der kezinde berilmeitini týraly synǵa ákep soǵady. Biraq qazir e-qyzmet-pen integratsiia jasalǵan soń, aqparat ýaqytyly jáne ózekti bolady», - dedi R. Eńsebaev QR Aqparat jáne qoǵamdyq damý ministrligi uiymdastyrǵan Aqparatqa qol jetkizý máseleleri jónindegi komissiia otyrysynda.
Sonymen birge, vitse-ministr ppublic.budget.kz – Sybailas jemqorlyqqa qarsy qyzmettiń interaktivti kartasy týraly aityp berdi.
«Bul – biýdjetti igerý boiynsha aqparatty interaktivti túrde kórsetýge múmkindik beretin durys bastama. Dálirek aitqanda, grafikalyq nysandy – onyń sýretin, qurylystyń qazirgi jaǵdaiyn, tólemderdi, osy jobany iske asyrý qarajatyn qalai igergenin kórýge bolady», - dep túsindirdi R.Eńsebaev.
Ministrlik ókili biyl Almaty men Nur-Sultanda pilottyq rejimde bastalǵan «Halyq qatysatyn biýdjet» jobasyn da atap ótti. Jobany engizý bóliginde halyqaralyq tájiribe eskerilgen.
«Bir jaǵynan, bul – azamattardyń aýlalardy, sport alańdaryn abattandyrý máseleleri boiynsha naqty qajettilikteri. Jaqsy mysaldar bar. Biz pilottyq qalalar aiasynda bul bastamanyń áserin kórdik. Joba aiasynda biz normativtik bazany jetildirdik, ózgerister engizdik, halyq qatysatyn biýdjet uǵymdary anyqtaldy», - dep atap ótti R. Eńsebaev.
