QR Ulttyq ekonomika ministri Timýr Súleimenov Qazaqstan xalqynyń sany 18 million adamǵa jetkenin málimdedi, dep xabarlaidy "Ult aqparat".
"Ulttyq ekonomika ministrligine qarasty statistika komitetiniń málimetine sáikes, aǵymdaǵy jyly mamyr aiynda Qazaqstan xalqynyń sany 18 millionǵa jetti. Osylaisha, 11 mamyrda 18 millionynshy adam dúniege keldi. Ol Almaty oblysy Taldyqorǵan qalasynyń turǵyny - Múslima Samatqyzy. Múslima otbasyda ekinshi bala. Anasy - Omarxanova Diana Erikqyzy, mamandyǵy - defektolog. Ákesi - Bestibaev Samat Erkinbekuly, ustaz", - dedi Súleimenov Astanada ótken arnaiy baspasóz máslixatynda.
Ministrdiń aitýynsha, balanyń anasy 1991 jylǵy, al ákesi 1982 jyly týǵan. Náresteniń ózi salmaǵy - 3300 gramm, boiy 51 sm bolyp dúniege kelgen.
"Jalpy, táýelsizdik jyldary halyq sany 1 562,5 myń adamǵa nemese 9,5%-ǵa ósip, aǵymdaǵy jyldyń 1 maýsymǵa 18 014,2 myń adamdy qurady", - dep atap kórsetti ministr.
Al, ólim-jitimniń jalpy koeffitsienti 1000 adamǵa shaqqanda 1991 jylǵy 8,2-dan 2016 jylǵy 7,4 qaitys bolǵandarǵa tómendegen. Náreste ólim-jitimi jańa týǵan 1000 nárestege shaqqanda 1991 jylǵy 27,3-ten 2016 jyly 8,6-ǵa deiin azaidy.
Halyqtyń ómir súrý uzaqtyǵy 1991 jylmen salystyrǵanda 4,7 jylǵa, onyń ishinde erlerde – 5,3, áielderde 4,5 jylǵa ósti. 2016 jyly ómir súrý uzaqtyǵy 72,3, erlerde – 67,9, áielderde – 76,9 jyldy qurady.
