Dilerler Qazaqstannan Reseige jańa kólikterdi jappai shyǵaryp jatyr, - dep habarlaidy Tengrinews.kz tilshisi "Astana" telearnasyna silteme jasap.
Mysaly, Tatarstan kedeni jyl basynan beri oblysqa bizdiń elden 237 avtokólik ákelingenin habarlaǵan. Bir jyl buryn bul kórsetkish tórtke teń bolǵan.
Óitkeni, Reseide avtomobil ónerkásibinde daǵdarys baiqalady: baǵanyń kóterilýinen ondaǵy jańa kólikterdiń satylymy 70 paiyzǵa tómendegen. Shekaranyń arǵy jaǵynda bir modelgi kólik baǵasyna aiyrmashylyq million rýblden bastalady, deidi jeke dilerler.
Nur-Sultanda jerlesterine kólik alýǵa kómektesip júrgen reseilik jeke diler kólikti avtoortalyqtan satyp alyp, Resei Federatsiiasyna jóneltetin qazaqstandyqty tabý jetkilikti ekenin aitty. Bul shemaǵa sáikes, er adam qazirdiń ózinde 50-den asa kólik pen krossover satqan. Alaida jumysyn maýsymda ǵana bastaǵan.
"Alǵashqy satyp alýshylar Qazaqstan azamattary. Kedendik resimdeý úshin Qazaqstanda barlyq kedendik bajdy tóleimiz. Port qyzmetterine tóleimiz, sodan keiin kólikti tasymaldaýshyǵa salyp, Reseige aparamyz", - deidi kólik satyp alý jónindegi keńesshi Oleg Nurmuhametov.
Bul shemanyń jalǵyz qiyndyǵy - rýbldi teńgege aiyrbastaý. Reseilik bankter qazaqstandyqtarǵa qaraǵanda aqshany "utymsyz" baǵammen aiyrbastaidy, dep túsindirdi jeke diler.
Diler qazaqstandyqtarmen qarym-qatynas jasaý óte jaqsy ekenin moiyndady. Onyń pikirinshe, bizdiń elimiz avtomobil habyna ainalyp keledi.
"Durysyn aitý kerek, men qazaqstandyqtar tarapynan aldaýdy kezdestirgen joqpyn. Iaǵni, baǵany kelisip, qol alysyp, aldyn ala tólem jibersek – boldy. Qazaqstan qazir avtomobil habyna ainalyp keledi. Sizderde porttar bar, bul porttarǵa qazaqstandyq naryqqa arnalmaǵan tranzittik vagondar kóp keledi", - dedi Nurmuhametov.
