Aýyl sharýashylyǵy ministri Saparhan Omarov tóldeitin maldy kórshi elderge shyǵarý máselesin kóterdi, dep habarlaidy Sputnik Qazaqstan tilshisi.
Ministrdiń aitýynsha, búginde otandyq maldy shetelge shyǵarý qarqyny báseńdemei otyr. Resmi málimetke sáikes, byltyr 50 myń bas mal ózge elderge shyǵaryldy. Al biyl bes aidyń ishinde shetelge ketken maldyń sany 42 myńǵa jetken.
"Árine, bir jaǵynan ol jaqsy. Demek, aýyl sharýashylyǵy salasyndaǵy baǵdarlamalar jumys istep tur. Sharýalar maldy ósirip, ary qarai sata alady. Biraq ekinshi jaǵynan osy salada tártip buzýshylyqtar da az emes. Shetelge tóldeitin malymyz ketip jatyr. Biz ol maldy elge ózimiz ákelemiz. Oǵan qyrýar qarjy da bólinip turady. Ondai jaǵdaida tóldeitin maldy kórshi elderge shyǵarǵan durys emes", - dedi Omarov esep berýi kezdesýinde.
Onyń sózine qaraǵanda, ótken aptada arnaiy eki top Qytai men Ózbekstan shekarasyna jiberilgen bolatyn. Qazirgi kezde atalǵan toptar tiisti tekseristerdi bastap ketti.
"Aldyn ala málimetke sáikes, zań buzýshylyqtar óte kóp. Máselen, maldyń qulaǵyndaǵy birkany alyp tastaidy. Sodan ol maldyń qaidan shyqqanyn anyqtaý múmkin emes. Biz atalǵan tekserister boiynsha tiisti shara qabyldaimyz. Ázirge tóldeitin maldy shetelge shyǵarýǵa tyiym salý týraly usynys bar", - deidi Omarov.
Aita keteiik, byltyr indýstriialandyrýdyń ekinshi besjyldyǵy aiasynda túie men bie súti eksportqa shyǵaryla bastaǵan edi. Sútti untaq kúiinde óndiretin Qazaqstandaǵy jalǵyz kásiporyn Túrkistan oblysynda ornalasqan. Joba qýattylyǵy – 1,5 myń tonna sút. Kásiporyn 144 adamdy jumys ornymen qamtamasyz etip otyr.
