Búgin Almaty oblysynda shekarashylar Qazaqstannan Qytaiǵa deklaratsiialanbaǵan qarajat ótkizbek bolǵan eki azamatty ustady.
Bul týraly QR Qarjy ministrliginiń Memlekettik kirister komiteti baspasóz qyzmeti habarlady.
«2019 jyldyń 24 qyrkúieginde Almaty oblysy boiynsha Memlekettik kirister departamenti «Qorǵas» shekara mańy yntymaqtastyq halyqaralyq ortalyǵy» keden beketiniń qyzmetkerleri QR UQK ShQ №2088 áskeri bóliminiń qyzmetkerlerimen birlesip kedendik baqylaýdy júzege asyrý barysynda eki qazaqstandyq azamatty ustady», - delingen habarlamada.
Azamattar Qazaqstannan Qytaiǵa deklaratsiialanbaǵan 5 000 000 teńge jáne 5 531 000 teńge kóleminde qarajat alyp ótpek bolǵan.
«Qazirgi ýaqytta kináli tulǵalar QR «Ákimshilik quqyq buzýshylyq týraly» Kodekstiń 551-baby, 3-bólimi boiynsha ákimshilik jaýapqa tartyldy», - deidi baspasóz qyzmeti.
