Parlament Senatynda Qazaqstannan Armeniiaǵa munai ónimderin jetkizý qaǵidalary talqylandy, dep habarlaidy QazAqparat.
Aita keteiik, Parlament Senatynda Armeniia Respýblikasyna munai ónimderin berý jónindegi saýda-ekonomikalyq yntymaqtastyq kelisimi ratifikatsiialandy.
«Bul kelisimde ishki naryqty qorǵaý maqsatynda ýákiletti organnyń Armeniiaǵa taýar áketýge ýaqytsha shekteý belgileýge quqyǵy bar ekeni reglamenttelgen. Taýar tasymaldaý avtomobil, temir jol jáne teńiz kóligimen júzege asyrylady. Kelisimniń taǵy bir ereksheligi – Armeniianyń satyp alynǵan munai ónimderin úshinshi elderge satý faktileri anyqtalǵan jaǵdaida Qazaqstanǵa ótemaqy tóleýge tiis», - dedi Senat depýtaty Baýyrjan Qaniev.
Senatordyń aitýynsha, kelisim Qazaqstannyń Armeniiaǵa AI-92, 95, 98 markaly benzinin jáne dizel otyny siiaqty taýarlardy jetkizý boiynsha júzege asyrý qajet sharttardy aiqyndaidy.
Saýda-ekonomikalyq jáne ózara tiimdi yntymaqtastyq eki taraptyń ózara múddelerin qorǵaýǵa negizdeledi.
Kelisimde atalǵan taýarlardy óndirý kólemi, ishki tutyný teńgerimi, import pen eksport negizinde Armeniiaǵa tasymaldaý jónindegi quzyretti ýákiletti organdar men uiymdar aiqyndalǵan.
QR Energetika vitse-ministri Áset Maǵaýovtyń aitýynsha, bul kelisim baqylaýdyń birqatar tetikterin qarastyrady.
«Qazaqstan ulttyq qaýipsizdikti qamtamasyz etý jáne ishki naryqty qorǵaý maqsatynda indikativti balansta bekitilgen kólem asyp ketken jaǵdaida, fors-major jaǵdailarynda, sondai-aq Armeniia óz aýmaǵynan qazaqstandyq munai ónimderin úshinshi elderge jáne Eýraziia ekonomikalyq odaq elderine áketý tyiymy boiynsha mindettemesin buzǵan bolsa, Qazaqstan birjaqty tártippen Armeniiaǵa munai ónimderin bajsyz jetkizýdi toqtata jáne shektei alady. Sondyqtan bizdiń ishki naryǵymyz úshin qaýip-qater joq», - dedi Á. Maǵaýov.
Aita keteiik, Eýraziia ekonomikalyq odaq músheleri arasyndaǵy munai jáne munai ónimderin jetkizý 2014 jylǵy 29 mamyrdaǵy EAEO týraly shartqa sáikes jekelegen ekijaqty kelisimmen retteledi.
2020 jylǵy 16 shildede Nur-Sultan qalasynda Armeniia Respýblikasyna munai ónimderin berý salasyndaǵy saýda-ekonomikalyq yntymaqtastyq týraly kelisimge qol qoiylǵan.
