Almatydaǵy «Jetisý» keden beketinde altyn kontrabandasynyń joly kesildi, dep habarlaidy QazAqparat Qarjy ministrligi Memlekettik kirister komitetiniń baspasóz qyzmetine silteme jasap.
«23 shildede Almaty qalasyndaǵy halyqaralyq áýejaidyń ushý zalynda «Jetisý» keden beketiniń qyzmetkerleri shekara qyzmetimen birlesip, «Almaty-Ystanbul» áýe reisimen jalpy salmaǵy 319 gramm bolatyn 10 dana sary metaldan jasalǵan plastinalardy alyp bara jatqan AQSh azamatyn ustady. Qarjy ministrliginiń Memlekettik kirister komiteti Ortalyq keden zerthanasy jasaǵan saraptama nátijesine sáikes, tabylǵan taýar «affinirlengen altyn» retinde aiqyndaldy.
Sheteldik tulǵaǵa qatysty Eýraziialyq ekonomikalyq odaqtyń kedendik shekarasy arqyly tyiym salýlar men shekteýlerdi saqtamai, taýarlardy ótkizgeni úshin QR ÁQBtK-niń 545-baby boiynsha ákimshilik jaýapkershilik kózdelgen. Bul úshin jeke tulǵalarǵa taýarlar tárkilenip nemese tárkilenbei, on bes ailyq eseptik kórsetkish mólsherinde aiyppul salynady», - delingen resmi habarlamada.
