Soltústik Qazaqstan oblysy arqyly Qazaqstanǵa 400 gramǵa jýyq gashish kirgizbek bolǵan Resei turǵyny shekarada ustaldy, dep habarlaidy "Ult aqparat".
SQO Politsiia departamenti baspasóz qyzmetiniń málimetinshe, M.Jumabaev aýdandyq politsiia bóliminiń qyzmetkerleri QR Ulttyq qaýipsizdik komiteti Shekara qyzmetiniń áskeri qyzmetshilerimen birge esirtki tasymaldaýshyny ustady.
M.Jumabaev aýdanyndaǵy «Qaraqoǵa» keden beketinde «Toyota Landcruiser» avtokóligin tekserý kezinde mashinadan 397,35 gramm gashish tabylǵan. Rýlde 53 jastaǵy Resei azamaty bolǵan. Atalmysh fakti «Kontrabanda» babymen Sotqa deiingi tergep-tekserýdiń biryńǵai tizilimine engizildi. Bul bap boiynsha 15 jyldan 20 jylǵa deiin nemese ómir boiyna bas bostandyǵynan aiyrý jáne dúnie-múlkin tárkileý jazasy qarastyrylǵan. Sondai-aq kólik júrgizýshisi rýlge esirtkige elitken kúii otyrǵandyqtan, 15 táýlikke ákimshilik qamaýǵa alyndy.
SQO-da «Dármek» respýblikalyq jedel-aldyn alý is-sharasynyń ekinshi kezeńi ótti. Onyń maqsaty – esirtki jáne psihotropty zattardyń zańdy ainalymyn baqylaý. Tártip saqshylary 5 kún boiy meditsinalyq jáne farmatsevtikalyq mekemelerde esirtki zattary bar preparattardy saqtaý, paidalaný jáne joiý erejeleriniń qanshalyqty saqtalatynyn tekserdi.
«Operatsiia barysynda esirtki zattary bar preparattarǵa qatysty zańbuzýshylyqtardy anyqtamasaq ta, meditsinalyq maskalardyń zańsyz satylyp jatqanynyń ústinen tústik. Meditsinalyq ónim bolǵandyqtan ony tek dárihanalar ǵana sata alady. Meditsinalyq maskany zańsyz satýdyń 12 deregin jáne dárihanalarda bul buiymnyń baǵasyn kóterip satýdyń 2 faktisin anyqtadyq», - deidi SQO PD esirtki qylmysyna qarsy is-qimyl basqarmasy bastyǵynyń mindetin atqarýshy Ivan Terzidi.
Jedel-aldyn alý is-sharasy barysynda 3 qylmystyq zańbuzýshylyq anyqtalyp, 538,76 g esirtki tárkilendi. Jalpy jyl basynan SQO politseileri 226 kg túrli esirtkini ainalymnan aldy.
