Tarihi otanyna oralǵan otandastarymyzdy qoldaý sharalary týraly QR Úkimetinde ótken brifingte QR Premer-Ministriniń orynbasary Berdibek Saparbaev aityp berdi, dep habarlaidy "Ult aqparat".
B. Saparbaev atap ótkendei, ótken kezeńde 1 mln asa qandasymyz Qazaqstanǵa oralǵan.
«Bárine tiisti kómek kórsetildi: turǵyn úi berý, jol shyǵynyn óteý, kúnkóris shyǵyndaryn óteý, olardyń balalaryn mektepter men balabaqshalarǵa ornalastyrý, meditsinalyq qyzmettermen qamtý.
Keibir óńirlerde, mysaly, Pavlodar, Shyǵys Qazaqstan oblystarynda, Shymkent qalasynda jáne basqa óńirlerde tutas bir aýyldar salyndy. Sonymen qatar alty óńirde qandastarymyzdyń Qazaqstannyń zańdaryna, ómirine, saltyna jyldam úirenýi úshin ońaltý ortalyqtary salyndy.
Búginde basqa memleketterden kóship keletin qandastarymyzǵa qoldaý kórsetý jalǵasýda. Ótken 7 aida elimizge 6 myńnan astam qandasymyz kóship kelgen», — dedi QR Premer-Ministriniń orynbasary.
Sonymen qatar B. Saparbaev Qazaqstanǵa oralǵan keibir qazaqtar qujattaryn ýaqytyly tapsyrmaǵandyqtan, QR azamattyǵyn ala almai júrgenin aitty. Qoldanystaǵy zań boiynsha oǵan bir jyl ýaqyt beriledi.
«Elbasy tapsyrmasy boiynsha bul merzim osy jyldyń sońyna deiin uzartyldy. Biz ol jaily BAQ-ta habarladyq. Osy sátti paidalanyp, azamattyq almaǵan oralmandardyń ony alýy kerektigin aita ketkim keledi», — dep túsindirdi B. Saparbaev.
