Foto: videodan skrinshot
Qytaidyń Shyńjań-Uiǵyr avtonomiialyq aýdanynda qar barysy týrist áielge shabýyl jasady. Oqiǵa Qazaqstanǵa jaqyn ornalasqan Kóktuqai qalasyna irgeles eldi mekenderdiń birinde tirkelgen, dep habarlaidy Ult.kz.
Jergilikti buqaralyq aqparat quraldarynyń málimetinshe, týrist áiel eki dosymen birge taý shańǵysy kýrortynan qonaqúige qaityp kele jatqan sátte jyrtqysh ańnyń shabýylyna ushyraǵan. Oqiǵa Shyńjań óńiriniń soltústik-batys bóliginde bolǵan.
Áleýmettik jelilerde oqiǵa ornynan túsirilgen video tarady. Kadrlarda qar ústinde jatqan áiel men onyń janynda turǵan qar barysy anyq kórinedi. Shabýyldan keiin zardap shekken týrist jergilikti aýrýhanaǵa jetkizilip, meditsinalyq kómek kórsetilgen. Dárigerlerdiń aitýynsha, onyń jaǵdaiy turaqty.
Qazirgi ýaqytta oqiǵanyń mán-jaiy anyqtalyp jatyr. Osyǵan bailanysty jergilikti bilik ókilderi týristerge eskertý jasap, jabaiy janýarlardan qaýipsiz qashyqtyqty saqtaýǵa jáne saq bolýǵa shaqyrdy.
