Kóliktegi bas memlekettik sanitarlyq dáriger Sádýaqas Baiǵabylov 6 jáne 7 qazan kúni elge halyqaralyq reispen ushyp kelgen jolaýshylardyń koronavirýs boiynsha PTR-test qorytyndysyn jariialady, dep habarlaidy "Ult aqparat".
Kóliktegi bas memlekettik sanitarlyq dárigerdiń aitýynsha, 6 jáne 7 qazan kúnderi Qazaqstannyń 893 azamaty COVID-19 boiynsha PTR-anyqtamasyz ushyp kelgen. Olar tekserýden ótý úshin eki kúndik karantinge jatqyzylǵan.
«Ushyp kelgen jolaýshylary COVID-19 indeti boiynsha PTR ádisimen testten ótý úshin Nur-Sultan, Almaty, Shymkent, Aqtaý, Aqtóbe, Atyraý men Oral qalalarynda eki kúndik karantinge jatqyzyldy. Anyqtamasyz kelgen áýe jolaýshylarynyń báriniń PTR-analizderi koronavirýs juqtyrmaǵanyn kórsetti», - dedi Sádýaqas Baiǵabylov.
Aita ketsek, Qazaqstanǵa 6 jáne 7 qazan kúnderi PTR-testten anyqtamasy bar 2925 áýe jolaýshy (iaǵni 70 paiyzy) ushyp kelgen bolatyn.
Eske sala ketsek, búgin túnde Nur-Sultan qalasynyń áýejaiyna shetelden alty ushaq kelip qonǵan edi. Áýe reisterin Turkish Airlines, Air Astana, Velavia men Flydubai áýe kompaniialary oryndaǵan. Astanaǵa ushyp kelgen jolaýshylardyń 101-de PTR-anyqtamasy bolmaǵan.
Jańa erejelerge sáikes mynadai shekteý sharalary kúshine enedi:
Qazaqstanǵa shetelden áýe reisi arqyly kelgen azamattardyń bári de termometriiadan, anketalaýdan ótip, PTR ádisi arqyly COVID-19 boiynsha testten ótkeni týraly anyqtama (72 saǵatqa jaramdy) kórsetýi tiis;
Qazaqstan azamaty sanalmaityndar adamdar qolynda anyqtama bolmaǵan jaǵdaida elge kirgizilmeidi.
Dene temperatýrasy shekti normada bolǵan jáne anyqtama kórsetken azamatqa COVID-19 belgileri boiynsha túsindirý jumystary júrgizilip, tiisti qolhat berilgennen keiin olar baratyn jerine jiberiledi.
Dene qyzýy bar adamdar qolynda anyqtama bar-joǵyna qaramastan eki aptaǵa karantindik statsionarda oqshaýlanady. Ol jerde atalmysh azamat COVID-19 boiynsha tekserýden ótedi.
COVID-19 boiynsha testten ótkennen keiin koronavirýs juqtyrǵany belgili bolǵan azamattar infektsiialyq statsionarǵa aýystyrylady. Al juqtyrmaǵany anyqtalǵan azamattarǵa túsindirý júrgizilip, tiisti qolhat beriledi.
Ushyp kelgen QR azamattary anyqtama bolmaǵan jaǵdaida eki táýlikke karantindik statsionarǵa jatqyzylady. Ol jerde atalmysh azamat COVID-19 boiynsha tekserýden ótedi.
COVID-19 boiynsha testten ótkennen keiin koronavirýs juqtyrǵany anyqtalmaǵan azamattarǵa túsindirý júrgizilip, tiisti qolhat beriledi. COVID-19 juqtyryp kelgeni belgili bolǵan azamattar infektsiialyq statsionardyń karantindik oqshaýlaǵyshyna jatqyzylady.
