Reseilik saiasatker Vladislav Inozemtsev Qazaqstannyń kópvektorly syrtqy saiasaty jáne qańtar tragediiasynyń yqtimal saldary týraly pikir bildirdi, dep habarlaidy QazAqparat.
Reseilik «Komsomolskaia pravda» gazetiniń saitynda jariialanǵan suhbatta reseilik ekonomist áýel basta jap-jaqsy damyp bastaǵan Qazaqstan ekonomikasynyń qai burylysta syr bergeni týraly paiymyn aitady.
«Memleket aiaqtan turyp, ekonomika qaitadan qurylǵan shaqta aýqymdy sheshimder qabyldaný kerek ekeni túsinikti. Al ondai sheshimder árdaiym demokratiialyq jolmen qabyldana bermeidi. Sondyqtan, munai men gaz salasyndaǵy aýqymdy jobalar Qazaqstandy búgingi jaǵdaiǵa ákeldi. Nazarbaev ainalasyna ǵana arqa súiedi degenniń ózinde ol reformalar júrip jatty. Sondyqtan onyń bul ustanymyna kóz jumýǵa da bolatyn edi. Biraq áýel bastaǵy áleýet sarqylǵan shaqta biýrokratiia eldegi basty tejeýshi kúshke ainalyp shyǵa keldi. Aziianyń tájiribesi buǵan deiin de kórsetken. Jekelegen bileýshiler iri ekonomikany 15 jyldan artyq ýystan shyǵarmai basqarsa, mindetti túrde zardaby aýyr bolady», - deidi maman.
Reseilik saiasatkerdiń paiymynsha, kópvektorly syrtqy saiasatty ustaný Qazaqstanǵa ýaqyt ótken saiyn qiyn soǵýda.
«Qazaqstan únemi Resei, Qytai, Túrkiia jáne Batys elderiniń arasynda teńgerimdi saiasat ustanýǵa tyrysty. Búginge deiin bul qolynan keldi de. Biraq eldegi elita alańdaýly. Mundai teńgerimdi ustap turý ýaqyt ótken saiyn qiyndap barady. Sonda qazir Q.Toqaevtyń aldynda eki negizgi mindet tur. Ekonomikalyq mindet – oligarhiialyq júieni ydyratý, sybailas jemqorlyqpen kúres, Norvegiianyń nemese Birikken Arab Ámirlikteriniń úlgisindegi ulttyq ál-aýqat qoryn qurý. Al syrtqy saiasattaǵy mindeti – el ekonomikasynyń damýyna shynymen de yqpal ete alatyn áriptesterdi tańdaý. Birden aitaiyn, Reseidiń bir bóligine ainalý nemese odastas respýblika qurý máselesin, meniń oiymsha, Qazaqstan qarastyryp ta otyrǵan joq», -dedi Vladislav Inozemtsev.
Onyń aitýynsha, Qazaqstannyń bolashaǵynda bul daǵdarystyń róli erekshe bolmaq.
«Men keide tóńkeris ekonomikalyq ǵajaiypqa jol ashsa, keide ekonomikalyq ǵajaiyp tóńkeriske jol ashady der edim. Óitkeni ekonomikanyń qarqyndy jyljýy ishki tartys pen teketiresterdi ýshyqtyrýy múmkin. Degenmen, Qazaqstannyń keleshegi jaman jaǵdaida tur deýge kelmeidi. Onyń bir ǵana qarapaiym sebebi bar. Teńselissiz damýdyń jańa jolyna ótý múmkin bolmaǵan siiaqty. 2010 jyldardyń ortasynda Qazaqstan ekonomikasy sharshap-shaldyǵa bastady.
Osyndai daǵdarys jańa deńgeige shyǵý úshin kerek bolǵan da shyǵar. Biraq elitalar arasynda qarymta tóńkeris talpynystary bolmasa, bári qantógissiz de ótýi múmkin edi», - deidi Vladislav Inozemtsev.
