QR Bas memlekettik sanitar dárigeri Aijan Esmaǵambetova Qazaqstanǵa keletin shetel azamattaryna qandai talaptar qoiylatynyn aitty, dep habarlaidy QazAqparat.
A.Esmaǵambetova Ortalyq kommýnikatsiialar qyzmetindegi baspasóz máslihatynda shetelmen áýe bailanysyn jandandyrý komissiiada mindetti túrde qaralatynyn jetkizdi. Sáikesinshe, shetel azamattarynyń kelýine ruqsat berýdiń tiisti ólshemderi daiyndalǵan. Osy oraida úsh ólshem eskerilgen.
«Birinshiden, epidemiologiialyq jaǵdai (jolaýshy keletin memlekette) bizge qaraǵanda jaqsy bolsa. Qazaqstanda Qoǵamdyq densaýlyq saqtaý ulttyq ortalyǵy bar. Olar kún saiyn elimizdegi jaǵdaidy, sondai-aq tikelei halyqaralyq bailanys bar basqa da memleketterdegi epidemiologiialyq jaǵdaiǵa monitoring júrgizedi. Eger de osy elderde koronavirýsqa shaldyǵý boiynsha epidemiologiialyq jaǵdai birqatar kórsetkishtermen sipattalsa, onda bul memleketterden ushyp kelgen jolaýshylar elimizge qandai da bir shekteýsiz kiredi.
Ekinshiden, epidemiologiialyq jaǵdai bizdiń elimiz deńgeiinde, iaǵni aýrýǵa shaldyǵý nemese basqa kórsetkishter boiynsha Qazaqstandaǵy jaǵdaimen birdei bolsa, onda elge keletin adam teris analiz jóninde PTR-anyqtamany usynýy kerek. Anyqtama merzimi 5 kúnnen aspaýy tiis. Eger osy anyqtama bolmasa, bul jolaýshynyń málimetteri mobildi qosymshaǵa engiziledi. Sonymen qatar jolaýshy eki táýlik ishinde el ishinde PTR-testiden ótetindigi týraly qolhatqa qol qoiady nemese 14 kún boiy úi karantininde otyrady.
Úshinshi topqa bizdiń elge qaraǵanda epidemiologiialyq jaǵdaiy nashar memleketter enip otyr. Onda osy eldermen áýe bailanysyna tyiym salynady», - dedi A. Esmaǵambetov.
