Qazaqstannyń memlekettik shekaralarynda sanitarlyq-karantindik baqylaý jumystary qalai júrgizilip jatyr? Bul suraq boiynsha Densaýlyq saqtaý ministrliginiń Sanitarlyq-epidemiologiialyq baqylaý komitetiniń tóraiymy Aijan Esmaǵambetova málimet berdi, dep habarlaidy QazAqparat tilshisi.
«Ózderińiz biletindei, Bas memlekettik sanitariialyq dárigerdiń qaýlysyna sáikes 6 qazannan bastap Qazaqstannyń memlekettik shekaralarynda sanitarlyq-karantindik baqylaý jumystary kúsheitildi. Bul – áýe men avtokólik qozǵalysy boiynsha shekteý. Osylaisha búginge deiin 73 591 azamat (qazaqstandyq jáne sheteldik azamattar) avtokólikti ótkizý beketteri arqyly ótti. Olardyń ishindegi jolaýshylar – 21 279 adam. PTR-anyqtamasy joq azamattar eki kúndik karantinge jatqyzyldy. Ondai sanattaǵy jolaýshylardyń sany – 5967 adam boldy. Olardyń ishinde 122 adamnan koronavirýs anyqtaldy», - dedi Aijan Esmaǵambetova OKQ-da ótken baspasóz máslihatynda.
Komitet basshysy sonymen qatar halyqaralyq áýe reisteri arqyly Qazaqstanǵa 34 446 jolaýshy kelgenin, olardyń ishinde PTR-anyqtamasy joq 5 925 adam karantindik statsionarǵa jatqyzylǵanyn aitty.
«Solardyń ishinde 19 adamnyń boiynan koronavirýs anyqtaldy. Koronavirýs juqtyrǵan azamattar Túrkiia, BAÁ, Belarýs, Resei, Mysyr elinen kelgender», - dedi ol.
