Densaýlyq saqtaý ministri Eljan Birtanov elimizde koronavirýs infektsiiasynyń tirkelýine bailanysty qazaqstandyqtarǵa qatty alańdaýdyń qajeti joqtyǵyn málim etti, dep habarlaidy "Ult aqparat".
«Biz bastapqyda bul jańa shtamm - jańa koronavirýs ekenin aitqan edik. Bul álemde buryn ashylǵan shtamdardan ózgeshe. Tiisinshe, aýrýdyń belgisi de ártúrli. Sondyqtan biz DDSU-dan, infektsiia tirkelgen elderdiń densaýlyq saqtaý ministrlikterinen aqparat alamyz. Bizde bar málimetter osyndai sipatqa ie: patsientterdiń basym bóligi simptomsyz, jumsaq ótkerip, emdeýdi qajet etpeidi. Qazir koronavirýs infektsiiasymen betpe-bet kelgen kóptegen eldiń hattamalarynda olar, negizinen, úiinde karantinge jatady. Iaǵni, jeńil belgilerimen aýrýhanaǵa jatýdyń qajeti joq. Bul spetsifikalyq turǵyda emdeýdiń qajeti joqtyǵyn bildiredi», - dedi Eljan Birtanov OKQ-da ótken baspasóz máslihatynda.
Ministr kez kelgen aýrý siiaqty, koronavirýs infektsiiasyn juqtyrýdyń qalypty jáne aýyr dárejesi bolýy múmkin ekenin atap ótti. Bul negizinen aǵzanyń immýndyq júiesiniń kúiine, sozylmaly aýrýlardyń bolýyna bailanysty.
«Sondyqtan biz qazaqstandyqtarǵa qatty alańdaýdyń qajettigi joqtyǵyn aitqym keledi. Bul - respiratorlyq virýstyq infektsiia. Ol ártúrli qalypta bolady. Aitalyq, tumaý - sál aýyr túri. Kóbirek sý iship, maza ketse qabynýǵa qarsy preparattar qabyldaý kerek. Eger joǵary temperatýra, jótel siiaqty aýyr belgiler baiqalsa, jedel járdem shaqyrý kerek», - dedi ministr.
Eske sala ketsek buǵan deiin Densaýlyq saqtaý ministri Eljan Birtanov Qazaqstannyń eki azamatynan koronavirýs infektsiiasy tabylǵanyn málim etken edi.
