2020 jylǵy qańtar-jeltoqsan ailarynda respýblikalyq biýdjetten 772,3 mlrd teńge bazalyq zeinetaqy jáne 1 721,5 mlrd teńge yntymaqty zeinetaqy tólendi, dep habarlaidy "Ult aqparat".
QR Eńbek jáne halyqty áleýmettik qorǵaý ministrliginen málim etkendei, 2021 jylǵy 1 qańtardaǵy jaǵdai boiynsha elimizde zeinetkerler sany 2 mln 247 myń adamdy quraidy.
Aita keteiik, 2018 jylǵy 1 shildeden bastap memlekettik bazalyq zeinetaqy tólemi, ár azamattyń zeinetaqy júiesine qatysý ótilin eskere otyryp taǵaiyndalady.
Bul rette 1998 jylǵy 1 qańtardaǵy jaǵdai boiynsha yntymaqty júiede jumys istegen ýaqyty, sondai-aq mindetti zeinetaqy jarnalary tólengen kezeńder (MZJ) zeinetaqy júiesindegi eńbek ótiline qosylady.
Sonymen, eger zeinetaqy júiesindegi jumys ótili 10 jyl nemese odan az bolsa, sondai-aq eger múlde joq bolsa, bazalyq zeinetaqy eń tómengi kúnkóris deńgeiiniń 54% quraidy, sodan keiin 10 jyldan asqan ár jyl úshin onyń mólsheri 2% artady. Mysaly, eger qatysý ótili 20 jyl bolsa, bazalyq zeinetaqy eń tómen kúnkóris deńgeiiniń 74%, 30 jyl – eń tómen kúnkóris deńgeiiniń 94% quraidy. Jumys ótili 33 jáne odan da kóp jyl bolsa, eń tómen kúnkóris deńgeiiniń 100% mólsherinde belgilenedi.
Eger bir ai ishinde MZJ birneshe ret Biryńǵai jinaqtaýshy zeinetaqy qoryna jasalsa, jinaqtaýshy júiege qatysý merzimi bir aidy quraidy.
Osylaisha, mindetti zeinetaqy jarnalary neǵurlym turaqty jáne tolyq salynatyn bolsa, zeinetaqy jasyna jetkende bazalyq zeinetaqy tólemderiniń mólsheri soǵurlym kóp bolady.
Óz kezeginde, jasyna bailanysty zeinetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 ai qajet) jáne zeinetkerlikke deiingi kezeńde alynǵan ortasha ailyq tabysqa bailanysty bolady.
