Qazaqstanda az qamtylǵan nemese kópbalaly januiadaǵy jumyssyz azamattarǵa 4 paiyzben jeti jylǵa deiin shaǵyn nesieler beriledi. Bul týraly QR Eńbek jáne halyqty áleýmettik qorǵaý ministri Birjan Nurymbetov aityp berdi, dep habarlaidy QazAqparat.
Atalǵan bastama «Eńbek» memlekettik baǵdarlamasynda kórsetilgen.
«Bul baǵdarlamaǵa 2020 jyly 123 mlrd teńge qarastyrylǵan, 535 myń adamdy qamtimyz dep josparlap otyrmyz. Onyń ishinde az qamtylǵan nemese kópbalaly januiadaǵy jumyssyz azamattarǵa jeńildikter qarastyryp úlgerdik. Eger de «Eńbek» baǵdarlamasy boiynsha, shaǵyn nesieler 6 paiyzben bes jylǵa deiin beriletin bolsa, az qamtylǵan nemese kópbalaly januiadaǵy jumyssyz azamattarǵa bul nesie 4 paiyzben jeti jylǵa deiin beriletin bolady», - dedi B. Nurymbetov Ortalyq kommýnikatsiialar qyzmetinde ótken brifingte.
Sonymen birge, az qamtylǵan nemese kópbalaly januia músheleri úshin kishigirim jeke biznes ashýǵa tegin qaitarymsyz granttar berý tártibi de ózgertildi. Munda bir ailyq kásipkerlik negizderi týraly mindetti oqý talaby alynyp tastaldy. Iaǵni, olar oqýdan ótpei-aq, grant ala alady.
«Búginde jumystan qysqarýy múmkin táýekelderdi eskere otyryp, Úkimet jańa Jumyspen qamtý kartasyn ázirlep jatyr. Bul karta arqyly elimizdegi infraqurylymdyq jobalardy júzege asyrýdy kózdep ogtyrmyz. Iaǵni, áleýmettik nysandardy jańǵyrtý, kúrdeli jóndeý, orta jóndeý, turǵyn-úi kommýnaldyq infraqurylymdardy jańartý, injenerlik-kóliktik infraqurylymdardy jańartý, eldimekenderdi abattandyrý jumystary kózdeledi. Onyń sharttary men negizgi tetikterin erteńgi Úkimet otyrysynda tolyq jariialaimyz», - dedi ministr.
Buǵan deiin ministr qysqartýǵa ushyraǵan jumysshylardyń 6 ai boiy áleýmettik tólem ala alatynyn túsindirgen edi.
