Qazaqstandyqtardyń zeinetaqy jinaǵy 13,1 trln teńgeni qurady. Bul týraly búgin Úkimet otyrysynda QR Ulttyq bank tóraǵasy Erbolat Dosaev aitty, dep habarlaidy QazAqparat.
«Zeinetaqy aktivteri 1 aqpandaǵy jaǵdai boiynsha jyl basynan bastap 213,9 mlrd teńgege nemese 1,7 paiyzǵa ulǵaiyp, 13,1 trln teńge boldy. Biylǵy jyldyń basynan bastap eseptelgen investitsiialyq kiris mólsheri 178,5 mlrd teńgeni, zeinetaqy jarnalarynyń kólemi 88,8 mlrd teńgeni qurady», - dedi UB tóraǵasy.
Onyń atap ótýinshe, 2021 jylǵy qańtarda infliatsiia 0,6 paiyz bolǵan kezde 1,4 paiyz mólsherindegi kiristilik qamtamasyz etildi.
Sońǵy 12 aida zeinetaqy aktivteriniń kiristiligi infliatsiia deńgeii 7,4 paiyz bolǵan kezde 12,1 paiyzdy qurady.
«Naqty kiristilik investitsiialyq qyzmet, sondai-aq valiýta portfelin naryqtyq jáne baǵamdyq qaita baǵalaý nátijesinde qamtamasyz etildi. Onyń úlesi elder men emitentter boiynsha investitsiialar geografiiasyn keńeitý, portfeldiń sapasy men ótimdiligin arttyrý úshin kezeń-kezeńimen ulǵaitylyp, 30 paiyz deńgeiinde saqtalýda. Qarajatty merziminen buryn alý boiynsha salymshylar aldyndaǵy mindettemelerdi ýaqtyly oryndaý maqsatynda Ulttyq Bank zeinetaqy aktivteri portfeliniń aǵymdaǵy ótimdiligin qoldaýda. Onyń deńgeii biylǵy jylǵy 1 aqpanda 446,8 mlrd teńge boldy», - dedi Erbolat Dosaev.
