Premer-ministrdiń orynbasary - qarjy ministri Erulan Jamaýbaev Qazaqstanda jaldamaly turǵyn úi baǵasy kóterilýine qatysty pikir bildirdi, - dep habarlaidy Massaget.kz portaly.
Ol bári zańda kórsetilgen talaptarǵa sáikes jasalsa, jalǵa berýshiler jalǵa alynǵan turǵyn úiden turǵyndardy shyǵara almaitynyn atap ótti.
"Kóp jaǵdaida aýyzsha kelisim jasalady. Munda, árine, zań boiynsha eshteńe dáleldei almaisyń. Zań buzý - kelisimsharttardyń durys jasalmaýy saldary. Kelisimshart bolmasa, tekserý jáne Memlekettik kirister komitetine ony anyqtaýy qiyn bolady. Ázirge barlyǵy zań aiasynda, azamattarymyzdy qorǵaýǵa tolyq daiynbyz. Qajet bolǵan jaǵdaida zań aiasynda aralasamyz", - dedi Erulan Jamaýbaev.
"Mundai kelisim jasalǵan kezde jazbasha túrde kelisimshart jasasý kerek. Kelisim bolǵan kezde, quqyqtary buzylǵan adamdar sotqa júginip, bárin sheshe alady. Memleket tarapynan, Memlekettik kirister komiteti tarapynan tekserý qajet bolsa, tekseremiz. Shaǵyn biznesti jai teksere almaimyz, biraq olar zańdy túrde kásiporyndar ashyp, zańdy saqtap ári jeke kásipker retinde tirkelýine bar kúshimizdi salamyz", - dep atap ótti vitse-premer.
Sonymen qatar, ol turǵyn úi ieleri shaǵyn biznes sektoryna jatatynyn jáne ol moratorii tekseristerinen qorǵalatynyn eske saldy.
"Syrttan eshkim búldirmeidi, qazaqstandyqtardyń ózi otandastaryna baǵany kóterip otyr. Ózgelerdi qorǵap, keibir azamattardyń quqyqtaryna nuqsan keltire almaimyz. Zań aiasynda qaraý kerek. Mundai qajettilik týyndasa, moratoriige ózgerister engizýdi usynamyz. Salyqty zańdy túrde óndirip alý boiynsha usynystar bolsa, olardy qarastyryp, Prezidentke usynamyz", - dep qorytyndylady Erulan Jamaýbaev.
