QR Qarjy ministrligi salyq tóleýden jaltaratyn kásipkerlerdi anyqtaý úshin azamattardyń aqsha aýdarymdaryn tekserýdi josparlap otyr. Bul týraly QR Qarjy ministriniń mindetin atqarýshy Berik Sholpanqulov aitty, dep habarlaidy QazAqparat.
«Eger adam kiris alatyn bolsa, onda elektrondy túrde júzege asyrylatyn barlyq protsedýraǵa salyq salynýy tiis. Tólem kózinen ustalýy tiis. Kólemi ártúrli. Eger ol jeke kásipker bolsa, onda jeke tabys salyǵy, al eger zańdy tulǵa bolsa, onda korporativtik tabys salyǵy, qosylǵan qun salyǵy jáne basqalary. Barlyq tólemder jaiynda da aitýǵa bolmaidy. Siz óz jaqyndaryńyzdyń balansyn toltyryp, kómek kórsetýińiz múmkin. Barlyǵy derbes qaralady, naqty bir soma joq», - dedi ol Senattyń jalpy otyrysynan keiin BAQ ókilderiniń saýalyna orai.
Degenmen, munyń barlyq elektrondy tranzaktsiialarǵa qatysy bar ekendigin atap ótti.
«Máselen, eger siz kommýnaldyq esepshotty tóleseńiz ony tekserýge bolady ǵoi. Atalǵan qarjyny alýshy bar. Oǵan Salyq komiteti monitoring júrgizedi. Eger ártúrli jeke tulǵalardan tólem túsetin bolsa, onda ol adam kenetten 1 myń teńgeden ala bastady? degen suraq týyndaidy. Onyń kiris alyp jatqandyǵy da túsinikti. Al siz ákeńizge aqsha jiberseńiz onyń kiris emestigi túsinikti», - dedi Berik Sholpanqulov.
Sonymen qatar ol adamdardyń naýqasqa aqsha jinaý maqsatynda qarajat aýdarymdaryna qatysty máseleniń basyn ashyp berdi.
«Munyń barlyǵy artynan tekseriledi. Salyq qyzmeti tekseretin bolady. Tólem mártebesi engizilip qalar. Máselen, aqsha aýdarymy taýarǵa nemese qaiyrymdylyqqa aýdaryldy degen siiaqty. Iaǵni, saralaý júrgizilýi tiis, barlyq tólemder belgilenip otyrýy qajet. Eger jaqynyn qoldaýǵa aýdarsa, bir túri, taýar satyp alsa, basqa túri, túbirtek almaisyzdar ǵoi. Ol eski veleosiped sattyń ba, birden bizde salyq degendei bolmaidy», - dedi ol.
