2018 jyly Qazaqstanda lastaýshy zattardyń jalpy kólemi 2,5 mln tonnany qurady. Bul týraly QR Ekologiia, geologiia jáne tabiǵi resýrstar ministri Maǵzum Myrzaǵaliev málim etti, dep habarlaidy QazAqparat.
Búgin Parlament Senatynyń jalpy otyrysynda palata depýtattary «Aqparatqa kirý, sheshimder qabyldaý protsesine jurtshylyqtyń qatysýy jáne qorshaǵan ortaǵa qatysty máseleler boiynsha sot ádildigine qol jetkizý týraly konventsiiaǵa Lastaýyshtardyń shyǵaryndylary men tasymaldarynyń tirkelimderi týraly hattamany ratifikatsiialaý týraly» Zańyn qabyldandy.
Osy Hattamaǵa qosylý maqsaty Orhýs konventsiiasynyń erejelerimen negizdelgen. Aýaǵa shyǵarylatyn, sý men topyraqqa tógiletin qaýipti himiialyq zattar men lastaǵyshtardyń jyl saiynǵy kólemderin, ónerkásiptik jáne basqa da nysandardan alynatyn qaldyqtar aqparatyn jinaý, óndeý úshin kadastrlar nemese Lastaýyshtardyń shyǵaryndylary men tasymaldarynyń tirkelim júiesin birtindep engizý jóninde sharalar qoldanýǵa mindettimiz.
«Bul tirkelim «aýaǵa, tabiǵatqa qai nysandar lastaýshy, qaýipti himiialyq zattardy shyǵaryp jatyr?» jáne «qai ýaqyt aralyǵynda qandai kólemde shyǵarylady?» degen suraqtarǵa tolyq aqparat beretin bolady», - dedi Maǵzum Myrzaǵaliev.
Onyń sózine qaraǵanda, 2018 jyly Qazaqstanda lastaýshy zattardyń jalpy kólemi 2,5 mln tonnany quraǵan.
«Qazirgi tańda halyqtyń ekologiialyq jaǵdaiǵa qyzyǵýshylyǵynyń ósýine bailanysty, bizdiń elimizde qorshaǵan ortanyń jai-kúii týraly halyqty ýaqtyly habardar etý boiynsha jumystar atqarylyp jatyr. Sonyń biri AirKz mobildik qosymshasy iske qosylyp, oblys ákimdikteri jurtshylyqty aqparattandyrý úshin LED-ekrandar ornatý boiynsha jumys júrgizýde. Osy LED-ekrandarda aýanyń sapasy týraly málimet berilip jatyr. Sonymen qatar, atalǵan aqparat biriktirilgen sipatqa ie. Lastaýyshtardyń shyǵaryndylary men tasymaldarynyń tirkelimi siiaqty quraldardyń bolýy - halyqqa, kásiporyndar shyǵaryp jatqan ziiandy zattar boiynsha derekterdi usynýǵa múmkindik beredi», - dedi M. Myrzaǵaliev.
Osy atalǵan Tirkelim hattamasy 64 qyzmet túrin jáne 86 lastaýshy zattardy qamtidy. Atalǵan 64 qyzmet túriniń Qazaqstanda 32 túri jáne oǵan jatatyn 26 lastaýshy zattar qamtylady.
«Osy Tirkelimdi tsifrlandyrý maqsatynda IýNITAR (BUU oqý jáne ǵylymi-zertteý institýty) qoldaýymen 10 million teńgege granttyq qarajat alynyp, veb-portal ázirlendi. Ony Zalaldy zattardyń shyǵarylý jáne tasymaldaý tirkelimi derekterimen tolyqtyrý júrgizildi. Tirkelim veb-portaly tájiribelik paidalanýǵa engizildi. Keleshekte osy Tirkelim portalyn Biryńǵai memlekettik monitoring júiesi aiasynda basqa da aqparattyq júielermen ózara integratsiialaýdy josparlap otyrmyz. Ministrliktiń vedomstvolyq uiymymen ázirlengen Lastaýyshtardyń shyǵaryndylary men tasymaldarynyń tirkeliminiń veb-portaly kelesi jyly paidalanýǵa beriledi. Jalpy, Qazaqstanda qorshaǵan ortany qorǵaý jáne tabiǵatty paidalaný salasynda esep berý tetikteri bar, sondai-aq olar tirkelim iske qosylǵan kezde paidalanylatyn bolady», - dedi Myrzaǵaliev.
