Qazaqstan halqynyń bilikke degen senim deńgeiin anyqtaý maqsatynda el aýmaǵynda monitoring jasalyp, saýalnama júrgizildi, dep habarlaidy QazAqparat.
«Halyqtyń bilik institýttaryna degen senimi ózgerissiz qalyp otyr. Eldegi barlyq deńgeili biliktiń vertikali boiynsha halyqtyń basym bóligi, iaǵni 81,4 paiyzy Memleket basshysyna senim artyp otyr. Osy tusta aityp ótken jón, ótken jyldyń qarasha aiynan bastap, barlyq bilik institýttaryna degen halyqtyń senimi azaiǵan. Atap aitqanda, Úkimetke 18 paiyzǵa, Parlamentke 15 paiyzǵa jáne oblys ákimderine 13 paiyzǵa deiin senim tómendegen. Sonymen qatar halyqtyń eldimekender ákimderine degen senimi 5,7 paiyzǵa, máslihattarǵa 15 paiyzǵa jáne saiasi partiialarǵa 14,6 paiyzǵa tómendegen», - dedi QR Prezidenti janyndaǵy Qazaqstan strategiialyq zertteýler institýty direktorynyń orynbasary Alýa Joldybalina monitoring nátijesimen tanystyra otyryp.
Institýt basshysy orynbasarynyń málimetinshe, saýalnamaǵa qatysqan azamattardyń 43,7 paiyzy saiasi partiialardyń qyzmetine senip, oń baǵa beredi.
«Saýalnama kezinde respondentterge jańa partiialarǵa qatysty suraq qoiyldy. Sonyń aiasynda respondentterdiń 48,4 paiyzy jańa saiasi partiiany qoldaýǵa daiyn ekenin jetkizdi. Al saýalnamaǵa qatysqan árbir úshinshi azamat jańa partiiany qoldaýǵa daiyn emes ekendigin alǵa tartty. Jáne qatysýshylardyń 15,8 paiyzy atalǵan suraqqa jaýap berýge qinalatyndyǵyn aitty», - deidi ol.
