Bir millionnan astam qazaqstandyqtyń kepilsiz tutynýshylyq krediti boiynsha aiyppuly men ósimpuly keshirildi. Bul týraly búgin Qazaqstan ulttyq banki qarjy uiymdarynyń ádisnamasy jáne retteý departamentiniń direktory Dáýren Sálimbaev málimdedi, dep habarlaidy Sputnik Qazaqstan.
Qazaqstan prezidentiniń azamattardyń borysh júktemesin azaitý týraly jarlyǵyna sáikes, ekinshi deńgeili bankter men mikroqarjy uiymdarynan kepilsiz tutynýshylyq kredit alǵan qazaqstandyqtardyń aiyppuly men ósimpuly keshirildi.
Sálimbaevtyń aitýynsha, aiyppul men ósimpuly keshirilgen azamattardyń sany 1 millionnan asady.
"Aiyppuldar men ósimpuldardyń jalpy somasy 30 milliard teńgeden asady. Ulttyq bank osynyń 30 protsentin, iaǵni 10 milliard teńgesin óteidi. Qalǵany ekinshi deńgeili bankterdiń esebinen jabylady. Barlyq aiyppul men ósimpul keshirildi", - dedi Sálimbaev elordada ótken brifingte.
Buǵan deiin premer-ministrdiń birinshi orynbasary, qarjy ministri Álihan Smaiylov 5 million qazaqstandyqtyń aiyppuly men ósimpuly esepten shyǵarylatynyn aitqan bolatyn. Kepilsiz tutynýshylyq kreditter boiynsha aiyppuldar men ósimpuldardyń jalpy somasy 48 milliard teńgege jýyq degen edi ol.
Al áleýmettik turmysy tómen azamattardyń krediti tamyz aiynyń sońyna deiin ótelmek. Bul tizimge engen qazaqstandyqtardyń sany 500 myńnan asady.
Ol úshin kredittiń jalpy somasy 2019 jylǵy 1 maýsymdaǵy jaǵdai boiynsha 3 million teńgeden aspaýy kerek. Sol kezde memleket bir adamnyń 300 myń teńge mólsherindegi qaryzyn jaýyp beredi.
Áleýmettik topqa kiretinder:
- kópbalaly otbasylar;
- asyraýshysynan aiyrylýyna bailanysty tólem alatyn otbasylar;
- múgedek balalary bar, 18-den asqan bala jasynan múgedekter bar otbasylar;
- ataýly áleýmettik kómek alatyndar;
- jetim balalar;
- ata-anasynan kámelettik jasqa deiin aiyrylǵan, jiyrma toǵyz jasqa tolmaǵan, ata-ananyń qamqorlyǵynsyz qalǵan balalar.
Bul baǵyt boiynsha qaryz somasy 100 milliard teńgeni qurap otyr. Qazaqstandyqtardyń krediti respýblikalyq biýdjet esebinen óteledi.
