Exit poll nátijesinde qazaqstandyqtardyń 79,4 paiyzy Konstitýtsiiaǵa engiziletin túzetýler men ózgertýlerdi qoldap daýys berdi. Bul jaiynda «Demokratiia institýty» ǵylymi-zertteý qaýymdastyǵy» qoǵamdyq birlestiginiń direktory Tatiana Basharina aitty, dep habarlaidy QazAqparat.
«Demokratiia institýty» ǵylymi-zertteý qaýymdastyǵy» qoǵamdyq birlestigi sailaý ýchaskeleriniń shyǵa berisinde Exit poll ótkizdi. Saýalnama alý 375 ýchaskede, onyń ishinde 225 qalalyq jáne 150 aýyldyq referendým ýchaskesinde júrgizildi. 15 myńnan adamnan saýalnama alyndy. Zertteý qorytyndysynyń qateligi 2,7 paiyzdy quraidy. Demokratiia institýty Exit poll birinshi ret ótkizip otyrǵan joq. Ol Qazaqstanda 2007 jyldan bergi sailaý naýqandary kezinde beiimdelgen ádisteme arqyly júrgizildi», - dedi birlestik direktory KTK telearnasynyń tikelei efirinen.
Onyń atap ótýinshe, sailaý ýchaskeleriniń shyǵa berisinde daýys berýshilerge birlestiktiń saýalnama alýshylary «Siz Konstitýtsiiaǵa engiziletin ózgeristerdi qoldap álde qarsy daýys berdińiz be?» degen suraq qoiǵan. Sonymen qatar suhbat alýshylar daýys berýshilerdiń belsendiligin de tirkegen.
«Exit poll qorytyndysy boiynsha referendýmǵa qatysý 66,3 paiyzdy qurady. Jaqtap daýys bergender - 79,4, al qarsy bolǵandar - 20,6 paiyz», - dedi Tatiana Basharina.
Budan buryn habarlanǵandai, referendým barysynda el turǵyndary Konstitýtsiiamyzdyń 33 babyna 56 ózgeris engizý máselesine qatysty óz daýystaryn berdi.
5 maýsymda astana ýaqytymen saǵat 21.00-de elimizdiń barlyq óńirindegi referendým ýchaskelerinde daýys berý aiaqtaldy.
QR Ortalyq referendým komissiiasynyń hatshysy Muhtar Erman Ata zańǵa engiziletin ózgertýler men tolyqtyrýlarǵa qatysty ótkizilgen respýblikalyq referendýmda 8 030 739 azamat biýlleten alǵanyn aitty.
Osydan týra bir ai buryn QR Prezidenti Qasym-Jomart Toqaev 5 maýsymda respýblikalyq referendým ótkizý týraly Jarlyqqa qol qoiǵan edi.
