15 mamyr - Halyqaralyq Otbasy kúni. Osyǵan bailanysty Qazaqstandyq qoǵamdyq damý institýty «Rýhani jańǵyrý» otbasy institýtyn zertteý ortalyǵy 2020 jyldyń aqpan-naýryz ailarynda júrgizilgen zertteý derekterin jariia etti, dep habarlaidy QazAqparat.
«Siz úshin otbasy neni bildiredi?» degen suraqqa, suralǵan qazaqstandyqtardyń jalpy sanynyń 73,1% otbasyn ómirdiń máni retinde sanaitynyn jaýap berdi. Sondai-aq tanymal jaýaptar: 39% – «áýlettiń erteńi», 29% – «baqyt pen mahabbat», 16,9% – «jaýapkershilik pen mindettemeler», 7,9% – «qoǵamnyń negizi» jáne 1,6% – «jalǵyzdyqtan qutqarý» dep jaýap berdi.
Bul rette genderlik pikir turǵysy bylai qurylǵan: áielderdiń 75,1% jáne erlerdiń 51,3% otbasyn áýlettiń erteńi dep sanaidy.
«Ata-analardyń 69,3% «kópbalaly bolǵyńyz keldi me?» degen suraqqa, «Iia, men árqashan kópbalaly bolǵym keldi» dep jaýap berdi. Suralǵan myńdaǵan respondentterdiń 65,2% tórt balany tárbieleýde, 34,8% – bes jáne odan da kóp balany tárbieleýde», - dep atap ótti otbasy institýtyn zertteý ortalyǵynyń jetekshisi Juldyz Battalova.
Saýalnama málimetteri boiynsha, otbasylyq juptardyń kópshiligi (78,9%)ózderiniń otbasylyq qarym-qatynasyn «óte jaqsy, biz bir-birimizdi súiemiz jáne qurmetteimiz» dep baǵalady.
Zertteý sondai-aq, kóptegen adamdardyń pikirinshe, otbasylyq qatynastardy nyǵaitatyn mańyzdy sapa mahabbattan góri qurmet ekenin kórsetti. Suralǵandardyń 68,2% osylai sanaidy. Sondai-aq, otbasylyq respondentter arasynda 90,2%-y ómirine riza ekendigin atap ótti, bul rette ajyrasqan adamdardyń arasynda ómirine rizalar - 73,9% .
«70,4% balalardy tárbieleýde kúsh qoldanýǵa teris qaraidy, bul oryndy emes jáne durys emes dep sanaidy. Qazaqstandyq ata-analar ózara túsinistik, qurmet, mahabbat siiaqty emotsionaldyq faktorlarǵa kóńil bóledi», - deidi Juldyz Battalova.
Aita ketý kerek, bul zertteý Qazaqstanda alǵash ret ótkizildi. Zertteý qorytyndysy boiynsha osy máselege múddeli memlekettik organdar men basqa da uiymdar úshin usynymdar ázirlenedi.
