2020 jyly jan basyna shaqqanda bir jyldyń ishinde ortasha 23 keli siyr eti jelingen. Mundai derekti Ulttyq statistika biýrosy usyndy.
«2020 jyly úi sharýashylyqtarynyń tutyný shyǵystaryndaǵy eń úlken úles aldyńǵy jyldardaǵydai et jáne et ónimderin satyp alýǵa (19,2%) keledi. Siyr eti kóp suranysqa ie, ortasha jan basyna shaqqanda jylyna 23,072 keli siyr eti jelinedi. Qoi etin tutyný bir adamǵa orta eseppen jylyna 6,100, jylqy eti - 5,972, taýyq eti - 4,624, shoshqa eti - 3,356 keli mólsherinde baiqaldy», - dep atap ótedi vedomstvodan.
Vedomstvo málimetinshe, 2020 jyly ortasha eseppen jan basyna shaqqanda et pen et ónimderin tutyný 7 kelini qurady. 2000 jylmen salystyrǵanda et pen et ónimderin tutyný eki esege jýyq ósti. Sondai-aq, jemisterdi tutyný - 5 ese, balyq - 3 ese, jumyrtqa - 2 ese jáne tátti ónimder toptary (qant, djem, bal, shokolad, konditerlik ónimder) 2 ese artty.
«2020 jyly halyq tutynǵan taǵam ónimderiniń energetikalyq qundylyǵy kúnine ortasha jan basyna shaqqanda 3425 kkaldy qurady. Aýyldyq jerlerde turǵyndardyń tamaqtanýy (3437 kkal) qalaǵa qaraǵanda (3417 kkal) kaloriialyǵy boiynsha aitarlyqtai joǵary emes ekenin atap ótýge bolady. Tutynylatyn taǵam ónimderiniń himiialyq quramynda eń kóp úles kómirsýlarǵa keledi - 51,9 paiyz, al aqýyzdardyń úlesi 12,6, mailar - 35,5 paiyz», - dedi Ulttyq statitika biýrosynan.
