QR Densaýlyq saqtaý ministri Eljan Birtanov turǵyndardyń emhanaǵa tirkelý tártibi týraly aityp berdi, dep habarlaidy QazAqparat.
«Biz qaǵaz júzinde tirkeýden bas tarttyq, sebebi onda kemshilik kóp boldy. Turǵyndardyń ózine aitpai, syrtynan tirkep jiberetin sátter boldy. Ózim de sondai oqiǵanyń qurbany boldym. Meni basqa oblysqa tirkep qoiǵan. Adamdardyń ózi emhanaǵa baryp, tirkelmegendikten osyndai máseleler oryn alady. Men de atalǵan oqiǵadan keiin Nur-Sultan qalasynyń aýrýhanasyna tirkeldim. Ár adam óz densaýlyǵy úshin jaýapkershilikti túsinýi qajet», - dedi ministr jýranisterge bergen suhbatynda.
Onyń aitýynsha, emhanaǵa tirkelý arqyly halyq birneshe máseleni sheshe alady.
«Bul máseleni boldyrmaý úshin ákimdikterge tapsyrma berdik. Árbir emhanada halyqtyń E-gov arqyly tirkelýine kómektesetin adamnyń otyrýyn tapsyrdyq. Elektrondy tsifrlyq qoltańbaǵa úirenip qaldyq, degenmen ony qoldana almaityn qart adamdar bar. Sondyqtan, emhanaǵa tirkelýde kómek suraǵandarǵa járdem berilýi tiis», - dep atap ótti E. Birtanov. Sonymen birge, ministr emhanaǵa jylyna eki ret tirkelýge bolatynyn jetkizdi. «E-gov portalyna kirseńizder, «Elektrondy qujat» terezesi paida bolady. Onda qai emhanaǵa, qai dárigerge tirkelgenińizdi kóre alasyz. Ázirge jylyna eki ret qaita tirkelý múmkindigin berip otyrmyz. Tirkelý týraly aqparat bizge kelip túsedi de, jan basyna qarjylandyrý tártibimen emhanaǵa qarajat aýdaramyz. Muny kún saiyn baqylap otyra almaimyz, sondyqtan jylyna eki ret emhana aýystyrýǵa múmkindik beriledi», - dedi Eljan Birtanov.
