Mindetti meditsinalyq saqtandyrý qorynyń basqarýshy direktory Serik Táńirbergenov qazaqstandyqtardy kepildendirilgen tegin meditsinalyq kómek aiasynda tegin tekserýden ótýge shaqyrdy, dep habarlaidy QazAqparat tilshisi.
«Bizde eń qarapaiym densaýlyqty kútý degen ádet joq. Dál osyndai ádet bizge jetispeidi. Densaýlyq saqtaý júiesiniń kórsetkishterine súiensek, naýqastardyń kópshiligi aýrý meńdep, ábden shegine jetkende ǵana dárigerge habarlasady. Ótken jyly elimizdegi aýrýhanalarǵa shamamen 3 million adam jatqyzylsa, onyń 70 protsenti aýyr jaǵdaida jetkizilgen», - dedi Serik Táńirbergenov Ortalyq kommýnikatsiialar qyzmetinde ótken baspasóz máslihatynda.
Odan bólek, qor basshysy jyl saiyn baqiǵa attanatyndardyń jartysyna jýyǵy eńbekke qabiletti turǵyndar ekenin basa aitty.
«Bizde jyl saiyn 90 myńǵa jýyq adam kóz jumady. Onyń 40 myńy eńbekke qabiletti jasta baqilyq bolady. Olar kóp jaǵdaida júrek-qantamyr aýrýlarynan nemese qaterli isikten kóz jumady. Sondyqtan, aýrýdyń aldyn alý óte mańyzdy», - dep óz sózin tolyqtyrdy ol.
Sonymen birge, S. Táńirbergenov saý adamdardyń da jyl saiyn tegin tekserýden óte alatynyn eske saldy.
«Memleket tarapynan kepildendirilgen tegin meditsinalyq kómek aiasynda arteriialyq qysymdy ólsheý, elektrokardiografiia, lipidter men holesteringe qan saraptamasy sekildi tekserýlerden ótýge bolady. Munyń barlyǵy aýrýdy der kezinde anyqtaýǵa jáne kenetten keletin ólimdi aldyn alýǵa múmkindik beredi», - dep óz sózin túiindedi S. Táńirbergenov.
Aita keteiik, 7 sáýir kúni Qazaqstanda Dúniejúzilik densaýlyq saqtaý kúni atalyp ótedi. Bul kúni elimizdiń barlyq meditsinalyq uiymdarynda ashyq esik kúni uiymdastyrylady jáne kez kelgen niet bildirýshi tegin tekserýden ótip, arnaiy mamandardan konsýltatsiialyq kómek ala alady.
