Biyl kúzden bastap, qazaqstandyqtar joldardyń sapasyn mobildi qosymsha arqyly baǵalai alady, dep habarlaidy QazAqparat.
«Biz elimizdegi joldardyń sapasyn obektivti túrde baǵalaýǵa bolatyn «Sapaly jol» atty jobalyq keńse ashtyq. Bul jobaǵa qoǵamnyń árbir belsendi azamaty qatysa alady. Osy arqyly azamattyq qoǵammen birlese otyryp, joldardyń sapasyn qadaǵalaýmen qatar onda oryn alýy múmkin sybailyq jemqorlyqtyń aldyn alǵymyz keledi. Iaǵni endigi ýaqytta qazaqstandyqtar joldyń sapasyna óz baǵalaryn bere alady. Onyń ishinde óńirlik joldarmen qosa, respýblikalyq mańyzy bar joldar da bar», - dedi QR Sybailas jemqorlyqqa qarsy is-qimyl agenttigi parasattylyq departamentiniń direktory Daniiar Sabyrbaev agenttikte ótken baspasóz máslihatynda.
Departament basshysynyń sózine sensek, búginde joldyń sapasyn qadaǵalap, baǵalaityn mobildi qosymsha ázirlenip, testileýden ótkizilýde.
«Aldaǵy qyrkúiek aiynan bastap, árbir turǵyn jolda kele jatyp onyń sapasyna ózindik baǵasyn bere alady. Barlyq uialy telefonda akselerator bar, ol sizdiń júrgen qadamyńyzdy esepteidi. Sol siiaqty bizdiń qosymsha da arnaiy joldyń sapasyn anyqtaityn arnaiy datchik bar. Siz jolǵa shyqqanda smartfondy kóliktiń paneline qoiasyz. Eger jol jaqsy bolsa, telefonyńyz qozǵalmaidy. Al jol tegis emes nemese shuńqyr bolsa tiisinshe vibratsiia beredi. Tasjol qanshalyqty shuńqyrǵa toly bolsa, tiisinshe vibratsiia da jii bolady. Jolaýshylardyń bergen baǵasy sol sátte publicbudget.kz saityndaǵy derekter qoryna jiberiledi», - dedi ol.
Onyń aitýynsha, óz kezeginde joldyń sapasyn baǵalaý jobasyn «QazAvtoJol» ulttyq kompaniiasy qoldap otyr.
